खाँडादेवि मन्दिरमा पञ्चबली पुजा सम्पन्न
दोलख- रामेछापको खाँडादेवी मन्दिरमा बुधबार पञ्चवली पुजा सम्पन्न भएको छ । खाँडादेवी विकास कोषले सरकारको तर्फबाट राँगो, बोका, हाँस, कुखुरा र परेवाको बलि दिएर पुजा सम्पन्न गरेको हो ।
खाँडादेवी विकास कोषका कोषाध्यक्ष प्रकाश बुढाथोकीले राजाको पालादेखि चलिआएको यो परम्परालाई यसपटक पनि निरन्तरता दिइएको जानकारी दिए । उनका अनुसार सरकारी पक्षले यो पुजा गर्नमा वास्ता नगरेपछि कोषले नै सरकारको नाममा पुजा गरेको हो । राजाकालीन समयमा दरबारबाट सामाग्री ल्याई चैते र वडा दशैँमा पुजा हुने गरेको थियो । त्यसपछि बलि चढाइएका पशुको मासु प्रसादको रुपमा ग्रहण गर्ने परम्परा थियो । तर २०६६ सालपछि सरकारी पक्षले वेवास्ता गरेपछि यसलाई कोषले आफ्नै खर्चमा निरन्तरा दिइरहेको कोषाध्यक्ष बुढाथोकीले जानकारी दिए ।
कोषका पदाधिकारीहरूले पुरातत्व विभागलाई गुहारे पनि कुनै सुनुवाइ नभएको उनको गुनासो छ । जसको नाममा पुजा हुन्छ, उसैले बेवास्ता गरेपछि कोषका पदाधिकारी निराश भएका छन् ।
साथै सोही मन्दिरमा इजरायलमा अग्यात अवस्थामा रहेका नेपालका बिपिन जोशीको लागि पनि खाँडादेवीसँग प्रार्थना गर्दै पुजा गरिएको छ ।
