रामेछाप । नेपाली काँग्रेस लिखुतामाकोशी गाउँपालिकाले दसैँ तिहार तथा छठ पर्वको उपलक्ष्यमा शुभकामना आदान प्रदान कार्यक्रम आयोजना गरेको छ । नेपाली काँग्रेस लिखुतामाकोशी गाउँपालिका कार्यसमितिले विजया दशमी शुभ दीपावली तथा छठ २०८०को उपलक्ष्यमा शुभकामना आदान प्रदान कार्यक्रम धोबीमा गरेको हो ।
नेपाली काँग्रेस लिखुतामाकोशी गाउँपालिका सभापति भोजराज खड्का ( सुन्दर)को अध्यक्षतामा कार्यक्रम भएको थियो । कार्यक्रमका प्रमुख अतिथि समेत रहेका लिखुतामाकोशी गाउँपालिका अध्यक्ष केशव महतले दसैँ तिहार लगायत छठ पर्वको शुभकामना दिँदै चाड पर्वलाई धेरै भड्किलो नबनाउन आम नागरिक हरूलाई आग्रह गरे । महतले चाड पर्व मनाउने नाममा धेरै खर्च गर्ने प्रचलन बढेको भन्दै चाड पर्वलाई भड्किलो नगरी आफ्नो क्षमता अनुसार मात्र गर्न आग्रह गरे ।
त्यस्तै कार्यक्रमका विशेष अतिथि एवं नेपाली काँग्रेस प्रदेश सभा (क) का सभापति निरोज खड्काले नेपाल मात्र नभएर विश्व आर्थिक सङ्कट तर्फ अघि बढेको भन्दै चार्ड पर्वलाई भड्किलो बनाउने अरूको देखासिकी गर्ने भन्दा पनि सामान्य तरिकाले मनाउन आग्रह गरे ।
कार्यक्रममा गाउँपालिका उपप्रमुख दीपा पाख्रिन, नेकपा एमाले, नेकपा माओवादी, समाज पार्टी लगायत पार्टीका प्रमुख तथा प्रतिनिधि र नेपाली काँग्रेस लिखुतामाकोशी गाउँपालिकाका नेता कार्यकर्ताको सहभागिता रहेको थियो । कार्यक्रममा बोल्ने सहभागीहरूले शुभकामना दिँदै गाउँपालिकाको केन्द्र धोबी बजारलाई केन्द्र बिन्दु बनाएर राख्न पर्ने बताए । लिखुतामाकोशी गाउँपालिकाको पहिचान धोबी बजार भएको भन्दै धोबी बजारको पहिचान गुम्ने गरी गाउँपालिकाको भवन निर्माण गर्न नहुने भन्दै सबै दलका नेता कार्यकर्ताहरूले गाउँपालिकालाई आग्रह गरेका काँग्रेस सभापति भोजराज खड्का (सुन्दर) ले जानकारी दिए ।
