काठमाडौं । नेपाली कांग्रेस भोली आकांक्षीहरु सहितको बैठक बस्ने भएको छ । इलाम–२ र बझाङ प्रदेशसभा १ मा हुने उपनिर्वाचनको उम्मेदवार आज पनि टुंगो लगाउन नसके पछी भोली आकांक्षी सहितको बैठक बस्न लागेको हो ।
बुधबार संसदीय बोर्डको बैठकमा सभापति शेरबहादुर देउवाले इलाम–२ मा डम्बर खड्कालाई उम्मेदवार बनाउन प्रस्ताव राखेका छन् । तर महामन्त्री गगन थापा सहितका नेताहरुले डम्बरलाई नभई भेषराज आचार्यलाई दिनुपर्ने भनेपछि बैठक निर्णय नगरी सकिएको हो । अर्को बैठक बिहीबार बिहान ९ बजे बस्नेछ ।
बुधबारको बैठकमा सभापति देउवाले ४ मंसिर २०७९ मा भएको निर्वाचनमा एमालेका सुवासचन्द्र नेम्वाङसँग ११४ मतान्तरले मात्र पराजित भएकाले खड्कालाई नै टिकट दिएर न्याय गर्नुुपर्ने बताएका छन् । ‘उसले उठ्दिन भनेको भए एउटा कुरा हुन्थ्यो, उठ्छु भनेपछि अर्को व्यक्तिलाई टिकट दिनु न्यायसँगत हुन्न भन्ने सभापतिज्यूको कुरा रह्यो’ बैठकमा सहभागी एक नेताले भने ।
महामन्त्री गगन थापाले भने इलाम–२ को पार्टी संरचनामा भेषराज लोकप्रिय भएकाले चुनाव जित्न उनैलाई टिकट दिनुपर्ने अडान राखेका छन् । उहाँले टिकट पाउनु भएको भए जित्नुहुन्थ्यो कि, त्यसैले पुरानो निर्वाचनको कुरा गरेर हुँदैन, पार्टी संरचनामा जो लोकप्रिय छ उसैलाई दिनुपर्छ’ महामन्त्री थापाको भनाइ उधृत गर्दै ती नेताले भने ।
