रामेछाप । लिखु तामाकोशी गाउँपालिकाका अध्यक्ष गोबिन्दबहादुर खड्काले आफु जेलमा रहँदा आफ्नो अनुपस्थितीमा गाउँ पालिकाले बिरामी जनतासँग उठाएको एम्बुलेन्सको रकम फिर्ता गर्ने बताएका छन् ।
सो कुरा उनले पाँच महिनापछि आफ्नो अध्यक्ष पद पुर्नबहाली गर्ने क्रममा संचारकर्मीहरु माझ बताएका हुन् । अध्यक्ष खड्काले आफ्नो कार्यकालमा गाउँपालिकाका सबै बिरामीहरुलाई अस्पतालसम्म पुर्याउँन निःशुल्क रुपमा एम्बुलेन्स संचालन गरेका थिए । पाँच महिना अघि अध्यक्ष खड्कालाई केही व्यक्तीले षडयन्त्र पूर्बक शरीर बन्धक, जर्बजस्ती करणी र ठगी गरि तीनवटा मुद्धा लगाएर प्रहरीले हिरासतमा लिएपछि गाउँपालिकाका केही व्यक्तिले बिरामीले एम्बुलेन्स प्रयोग गरेबापत रकम उठाउन शुरु गरेका थिए ।
आफ्नो कार्यकालमा बिरामी जनतालाई निःशुल्क एम्बुलेन्स संचालन गर्ने पालिकाले निर्णय गरेपनि म जेल गएपछि सो निर्णय बिरुद्ध बिरामीले एम्बुलेन्स प्रयोग गरे बापत ७ हजारको दरले रकम लिने निर्णय गरेको रहेछ । उक्त निर्णय आजैका मितिदेखी लागु हुने गरि खारेज गरेर सबै जनतालाई निःशुल्क एम्बुलेन्स सेवा उपलव्ध गराउने लिखु तामाकोशी गाउँपालिकाका अध्यक्ष गोबिन्दबहादुर खड्काले जानकारी दिए ।
उनले भने– म जेलमा रहँदा ५ महिनाको अवधिमा कुन–कुन बिरामीले के–कती रकम एम्बुलेन्स प्रयोग गरे बापत तिर्नु भयो । त्यो तिरेको बिल लिएर मसँग आउँनुस त्यो रकम म व्यक्तिगत रुपमा फिर्ता गर्र्ने छु । पालिकासँग पाँच महिनाको अवधिमा बिरामी जनतासँग उठाएको एम्बुलेन्सको रकमको सबै हिसाब किताब समेत खोज्ने अध्यक्ष खड्काले बताए ।
गाउँपालिकाले बिरामीलाई निःशुल्क रुपमा प्रयोग गर्न दिएको एम्वुलेन्स पालिकाको अध्यक्ष नहुने बित्तिकै पुनः पालिकाले रकम उठाउन थालेपछि गाउँका बिरामी नागरिकहरु मारमा परेको लिखुतामाकोशी गाउँपालिका वडा नं–५ कि बिन्दा खड्काले जानकारी दिइन । उनले भनिन्– पालिका प्रमुखले जनतालाई निःशुल्क एम्बुलेन्स सेवा दिदा धेरै खुशि भएका थियौ । पछि पुनः एम्बुलेन्स प्रयोग गरेवापत रकम तिर्नु पर्दा सारै दुःख लागेको थियो । पालिकाका अध्यक्षले पुनः पदबहाली गरेसँगै एम्बुलेन्स प्रयोग गरे बापतको रकम निःशुल्क घोषणा गरेपछि आफुहरुलाई धेरै खुशी लागेको खड्काले बताइन ।
लिखुतामाकोशी गाउँपालिकाको अध्यक्षको रुपमा पाँच महिनापछि पुनः पदबहाली गरेका अध्यक्ष खड्काले गाउँपालिकाको मेरुदण्डको रुपमा रहेको हलेदेबेसी–धोबी सडक कालोपत्रे गर्ने बताएका छन् । त्यसैगरी खानेपानीको चरम समस्या झेल्दै आएका नागरिकहरुलाई खानेपानी सहज बनाउन तत्काल योजना अघि सार्ने बताएका छन् ।