मकवानपुर । बागमती प्रदेशका मुख्यमन्त्री इन्द्रबहादुर बानियाँले जनताको मतलाई सम्मान गर्दै जनमुखी, गरिबमुखी र न्यायमुखी काम गर्ने दृढता व्यक्त गरेका छन् ।
प्रदेशको मुख्यमन्त्री बनेपछि पहिलो पटक बुधबार आफ्नै निर्वाचन क्षेत्र मकवानपुर क्षेत्र नम्बर–२ (ख) अन्तर्गत मनहरी गाउँपालिकामा आयोजित औपचारिक कार्यक्रममा सहभागी भएका बानियाँले आफूलाई जिताएर पठाएका मतदाताको भरोसा अब काम गरेर तिर्ने प्रतिबद्धता जनाए ।
“मनहरीका जनताले विश्वास गरेर प्रदेशसभा सदस्य बनाएका कारण म आज मुख्यमन्त्री बन्न सकेको हुँ,” बानियाँले भने, “अब यो वा त्यो पार्टी नभनी सबैको आवश्यकतालाई मध्यनजर गरेर विकास गर्नु मेरो कर्तव्य हो ।”
उनले मनहरी गाउँपालिकाको लामिटार–चकरी–मकरी सडकलाई प्राथमिकतामा राखी कालोपत्रे गर्ने, पुल–पुलेसा र अन्य पूर्वाधार निर्माणमा विशेष ध्यान दिने आश्वासन पनि दिए । साथै, महिलाको महान पर्व हरितालिका तीजलाई सभ्य, भव्य र सुसंस्कृत ढङ्गले मनाउन आग्रह गरे ।
गाउँपालिका उपाध्यक्ष सीता पुलामी मगरको अध्यक्षतामा सम्पन्न कार्यक्रममा प्रदेशका आर्थिक मामिला तथा योजना मन्त्री प्रभात तामाङ, खानेपानी, उर्जा तथा सिँचाई मन्त्री कृष्णकुमार तामाङलगायतको आतिथ्यता थियो । कार्यक्रममा मुख्यमन्त्रीलाई सम्मानपत्रसमेत प्रदान गरिएको थियो ।
सो अवसरमा गाउँपालिका अध्यक्ष रन्जन कालाखेती, मकवानपुरकी प्रमुख जिल्ला अधिकारी स्किम श्रेष्ठ, नेपाली कांग्रेस नेतृ कमला मैनालीलगायतले मन्तव्य व्यक्त गरेका थिए । मुख्यमन्त्री बानियाँले त्यसपछि आफ्नै निर्वाचन क्षेत्रमा रहेको सम्पर्क कार्यालय पुगेर स्थानीय नागरिकका समस्या र गुनासा सुनेका थिए ।
