रामेछाप .- जनैपूर्णिमाको अवसरमा जट्टापोखरी र पाँचपोखरी तीर्थयात्रामा जाने भक्तजनहरूको स्वास्थ्य सुरक्षालाई ध्यानमा राख्दै गोकुलगंगा युवा सञ्जालले निःशुल्क स्वास्थ्य शिविर सञ्चालन गर्ने भएको छ।
उचाइ, चिसो मौसम र शारीरिक थकानका कारण तीर्थयात्रीहरूलाई स्वास्थ्य समस्या देखिन सक्ने भएकाले शिविरमार्फत रक्तचाप परीक्षण, प्राथमिक उपचार, स्वास्थ्य परामर्श तथा आवश्यक औषधि वितरण निःशुल्क गरिने सञ्जालले जनाएको छ। शिविर रामेछापको पानीपाखा क्षेत्रमा सञ्चालन हुनेछ।
स्वास्थ्य सेवा प्रवाहलाई प्रभावकारी बनाउन गोकुलगंगा अस्पताल र चुचुरे स्वास्थ्य चौकीका स्वास्थ्यकर्मी तथा उपकरण परिचालन गरिनेछ। यस्तै, अर्किड मेडिकल हल शिवालय, गौरीशंकर संरक्षण क्षेत्र र शिवालय क्लिनिक एण्ड थाइराइड सेन्टरले औषधि तथा सामग्री सहयोग गरेका छन्।
यात्रा मार्गमा स्वयंसेवकहरू परिचालन गरिने आयोजकले जनाएको छ। उनीहरूले यात्रुहरूको सहजीकरण, सुरक्षा तथा सूचना प्रवाहमा सहयोग गर्नेछन्।
गोकुलगंगा युवा सञ्जालले जनैपूर्णिमा पर्वका अवसरमा जट्टापोखरी–पाँचपोखरी जाने सम्पूर्ण भक्तजनलाई सुरक्षित यात्रा, राम्रो स्वास्थ्य र आध्यात्मिक शान्तिको शुभकामना व्यक्त गरेको छ ।
