काठमाडौं । जंगीअड्डामा आफ्ना माग राख्न पुगेका जेनजी प्रतिनिधिहरु गणतन्त्र वा राजतन्त्रका विषयमा नै विभाजित भएका छन् । १५ भन्दा बढी प्रतिनिधि नेपाली सेनाको मुख्यालय प्रवेश गरेर छलफलमा सहभागी भए पनि उनीहरू दुई धारमा बाँडिएका थिए । एक पक्षले संघीयता र धर्मनिरपेक्षता खारेज गर्दै राजतन्त्र फर्काउनुपर्ने प्रस्ताव राखे भने अर्को पक्षले गणतन्त्रलाई विकल्प नखोजी सुधार्दै अघि बढ्नुपर्ने मत दियो ।
छलफलबाट बाहिरिएकी रक्षा बमले ‘आन्दोलनको न्यूनतम मर्म विपरीत छलफल अघि बढेपछि बाहिरिनुपरेको’ बताइन्। स्रोतका अनुसार, उनको संकेत राजतन्त्र पुनःस्थापनासम्बन्धी प्रस्तावप्रति थियो।
प्रधानसेनापति अशोकराज सिग्देलले सुरुमा जेनजीलाई संयोजक तोकेर एकमत भएर आउन समय दिएका थिए। तर, आन्तरिक मतभेदकै कारण उनीहरू स्पष्ट दुई खेमामा बाँडिए। केही प्रतिनिधिले स्वतन्त्र नेतृत्वमा नागरिक सरकार गठन र शहीद–घाइते परिवारलाई प्राथमिकता दिनुपर्ने धारणा राखे। यसबीच, सेनाले वार्ता प्रक्रियामा रास्वपा र व्यवसायी दुर्गा प्रसाईंको धारणा पनि समेट्नुपर्ने बताएको छ। ‘यी पक्षलाई बाहिर राख्दा भोलि फेरि समस्या नआओस् भन्ने हो,’ सैनिक स्रोतले भन्यो।
सैनिक अधिकारीहरुले संवादबाटै समाधान खोज्ने अडान राखेका छन्। सहमति जुटेपछि राष्ट्रपति कार्यालयसँग प्रत्यक्ष वार्ता गर्ने तयारी रहेको बताइएको छ। यसअघि, सोमबार भएको प्रदर्शनमा प्रहरीले अत्यधिक बल प्रयोग गर्दा कम्तीमा १९ जनाको मृत्यु भएको थियो भने २०० भन्दा बढी घाइते भएका थिए। त्यसपछि संसद् भवन, सिंहदरबार, सर्वोच्च अदालतलगायतका स्थलमा आगजनी भएको थियो।
