मन्थली- जिल्ला विपद् व्यवस्थापन समिति रामेछापको बैठक सम्पन्न भएको छ । शुक्रबारदेखि सुरु निरन्तरको बर्षाबाट सिर्जित समस्या र समाधानका उपायबारे छलफल र विभिन्न निर्णय गर्दै बैठक सम्पन्न भएको हो । जिल्ला विपद् व्यवस्थापन समितिका अध्यक्ष एवं प्रमुख जिल्ला अधिकारी श्यामकृष्ण थापाको अध्यक्षतामा भएको बैठकमा बर्षाजन्य बिपद प्रतिकार्यका लागि सबै रणनीतिहरु अपनाइने निर्णय भएको छ ।
अविरल वर्षाका कारण जिल्लाका विभिन्न स्थानमा बाढी र पहिरो गएकोले यातायात सेवामा अवरोध पुगेको बैठकमा छलफल भएको छ। विशेषगरी मन्थलीदेखि काठमाडौं जोड्ने बी.पी. राजमार्ग अवरुद्ध हुँदा यात्रुहरूले सास्ती भोग्नुपरेको छ। यस समस्यालाई मध्यनजर गर्दै काठमाडौं-मन्थली उडान दैनिक सञ्चालन गर्नका लागि संस्कृति, पर्यटन तथा नागरिक उड्डयन मन्त्रालय र विभिन्न एयरलाइन्सहरूसँग समन्वय गर्ने निर्णय भएको छ ।
मन्थली सिन्धुली जोड्ने खुर्कोटको पुलको निगरानी बढाउने र एक पटकमा एक वटा मात्र सवारी साधन पास हुने व्यवस्था मिलाउने निर्णय भएको छ ।अवरुद्ध सडकहरू तत्काल खुलाउनका लागि स्काभेटर, जेसीभी, टिपरलगायतका आवश्यक उपकरणसहित स्थानीय तह, सडक डिभिजन कार्यालय र पूर्वाधार विकास कार्यालयलाई तयारी अवस्थामा रहन निर्देशन दिएको छ।
बैटकमा विपदजन्य घटनाबाट हुन सक्ने क्षतिलाई न्यूनीकरण गर्ने, उद्धार तथा राहत कार्यका लागि जिल्लाका सबै सरोकारवाला निकायहरू लाई समन्वयका साथ काम गर्न आह्वान गरिएको विपद् व्यवस्थापन समितिले जनाएको छ । बैठकमा विपदको समयमा धैर्यधारण गरी सुरक्षित रहन सम्पूर्ण जिल्लावासीलाई अनुरोध गरिएको छ ।
