रामेछाप । रामेछाप जिल्ला सहकारी संघको छैंठौं बार्षिक साधारण सभा मन्थलीमा सम्पन्न भएको छ । जिल्ला सहकारी संघका अध्यक्ष हिमाल ढुंगेलको अध्यक्षतामा शनिबार मन्थलीमा छैंठौं बार्षिक साधारण सभा सम्पन्न भएको हो ।
जिल्ला सहकारी संघको छैंठौं बार्षिक साधारण सभाको उद्घाटन सभामा सम्बोधन गर्दै प्रतिनिधि सभा सदस्य समेत रहेका नेपाली काँग्रेसका सभापती पूर्णबहादुर ( कान्छाराम ) तामाङ्गले रामेछाप जिल्लाका सहकारीहरुलाई अव उत्पादनसंग जोड्नु पर्ने बताएका छन् । सांसद तामाङ्गले सहकारी संस्थाहरुले वित्तिय कारोबारका अतिरिक्त उत्पादनशिल क्षेत्रमा समेत काम गर्नु पर्ने बताएका छन् । सांसद तामाङ्गले भने सहरकारी संस्थाहरुको ध्यान अब जलविद्युत, उद्योग, कृषि, पर्यटन तथा कलकारखाना संचालनतर्फ जानु पर्छ । उत्पादन संग जोड्न सकिएन भने हुन्न् । यो भन्दा अघि सहकारी कसरी चल्यो भन्ने हैन् । अब उत्पादन क्षेत्रमा लाग्न पर्छ अनि मात्र देशले आर्थिक विकास गर्न सक्छ । मुलुक आर्थिक संकटमा छ । अब सहकारीसंग रहेको पूँजी परिचालन गर्न सरकारले सक्नु पर्छ । त्यसो गरे देशको आर्थिक संकट हटाउन र देशको आर्थिक बिकासका लागि ठुलो योगदान पुर्याउन सकिने साँसद तामाङ्गलेले बताए ।
बार्षिक साधारण सभामा रामेछाप जिल्ला बचत तथा ऋण सहकारी संघका अध्यक्ष जगन्नाथ दाहाल, संघका निवर्तमान अध्यक्ष गोविन्द प्रसाद घिमिरे, नेपाल पत्रकार महासंघका अध्यक्ष बद्री नयाँघरे, जिल्ला कृषि सहकारी संघका अध्यक्ष कुमार श्रेष्ठ, जिल्ला बहुउदेश्यीय सहकारी संघका अध्यक्ष चन्द्र मानन्धर, जुनार सहकारी संघका अध्यक्ष पदम तामाङ्ग, जिल्ला सहकारी संघका उपाध्यक्ष श्याम थापा लगायतका बक्ताहरुले सहकारी संघ संस्थाको बर्तमान अबस्था र चुनौतीका बारेमा आ आफ्नो धारणा राखेका थिए ।
साथै संघले साधारण सभाको अवसरमा फरक फरक ३ वटा विधामा सहकारी क्षेत्रमा योगदान पुर्याउने अभियान्ता तथा संस्थालाई सम्मान समेत गरेको छ । उत्कृष्ट सहकारी संस्थामा नवजागरण बचत तथा ऋण सहकारी संस्था, उत्कृष्ट सहकारी अभियान्तामा जनहित कोष बचत तथा ऋण सहकारी संस्थाका अध्यक्ष मुकुन्द प्रसाद कडरिया र उत्कृष्ट व्यबस्थापकमा मन्थली बचत तथा ऋण सहकारी संस्थाका व्यबस्थापक भेषबहादुर श्रेष्ठलाई सम्मान गरेको छ ।
सभाको बन्द सत्रले सचिव नविन केसीद्धारा प्रस्तुत प्रतिवेदन, कोषाध्यक्ष योगेन्द्र श्रेष्ठद्धारा प्रस्तुत आर्थिक प्रतिवेदन र लेखा सुपरिवेक्षण समितिका संयोजक छत्र श्रेष्ठद्धारा प्रस्तुत लेखा सुपरिवेक्षण समितिको प्रतिवेदन सर्वसम्मत पारित गरेको छ ।
