रामेछाप – नेपाली काँग्रेस रामेछापले शुक्रबार १० औं संविधान दिवस विशेष ‘सद्भाव र्याली’सहित मनाएको छ । सभापति पुर्ण बहादुर तामाङ ( कान्छाराम)को नेतृत्वमा मन्थलीको कटहरबोटबाट सुरु भएको र्याली बिपि चोक हुँदै पार्टी कार्यालयमा पुगेको हो । तर, यस वर्षको र्यालीमा नेपाली काँग्रेसले पार्टीको झण्डा बोकेन् । झण्डा र नारा विनाको र्याली बिनाको कार्यक्रमको कुुनै औचित्य नभएको भन्दै संगठनभित्र असन्तुष्टि देखिएको छ ।
र्यालीमा केवल नेपालको राष्ट्रिय झण्डा मात्रै बोकिएको थियो र्यालीमा कुनै नारा समेत लगाइएको थिएन । यही कारण केही नेता तथा कार्यकर्ताले कार्यक्रममा भाग नै लिएनन् । सहभागी नहुनुको कारण जनाउँदै उनीहरूले भने, “झण्डा र नारा विना गरिएको यो र्याली मलामी हिँडेजस्तो देखियो, संविधान दिवसको उत्सव यसरी मनाउन सकिँदैन ।”तर, बोल्ने क्रममा सभापति पुर्ण बहादुर तामाङले पार्टीको केन्द्रले दिएको आदेशअनुसार पार्टी झण्डा नबोकेको स्पष्ट पारे । उनले केन्द्रको निर्देशनअनुसार राष्ट्रिय झण्डामात्रै बोकेर सद्भाव र्याली निकालिएको बताए ।
पार्टी कार्यालयमा पुगेर आयोजित सभामा भने अधिकांश नेताहरूले संविधानको रक्षा सबै नेपालीको साझा जिम्मेवारी भएको बताएका थिए । उनीहरूले नेपालको संविधानलाई विश्वकै उत्कृष्ट दस्तावेजको रूपमा व्याख्या गर्दै दलगत स्वार्थभन्दा माथि उठेर यसको संरक्षणमा लाग्नुपर्नेमा जोड दिए ।
हालैको जेन–जी आन्दोलनको प्रसंग उठाउँदै नेताहरूले जेन–जी आन्दोलनको माग संविधान खारेज गर्ने नभई भ्रष्टाचार विरोध र सामाजिक सञ्जालमा लगाइएको प्रतिबन्ध हटाउनेमा सीमित रहेको बताए । तर, केही राजनीतिक दलले खराब नियतले आन्दोलनलाई भड्काएर देशका संरचना ध्वस्त पारेको बताए ।
नेताहरूले दिवंगत सभापति शुसिल कोइरालाले प्रधानमन्त्री हुँदा संविधान ल्याउन देखाएको साहसिक नेतृत्व र राष्ट्रपति रामचन्द्र पौडेलले संविधानको संरक्षणमा देखाएको त्यागलाई स्मरण गरे । उनीहरूले अब काँग्रेसका सबै तहका नेता तथा कार्यकर्ताले संविधानको रक्षा गर्न एकताबद्ध भएर अघि बढ्नुपर्ने आवश्यकता औंल्याए ।
२००७ सालदेखि प्रत्येक निर्णायक आन्दोलन र राजनीतिक मोडमा कांग्रेसले अग्रसर भूमिका खेल्दै आएको इतिहास स्मरण गर्दै नेताहरूले भने, “देशलाई संरक्षित गर्ने जिम्मेवारी होस् वा आन्दोलनको नेतृत्व गर्ने, काँग्रेस सधैं अग्रपंक्तिमा रहँदै आएको छ ।”