जुम्लामा जातीय विभेद र अपमानजनक शब्द प्रयोग गरेको आरोपमा प्रहरीले एक महिलालाई नियन्त्रणमा लिएको छ। जुम्ला सदरमुकाम कालेखोलीस्थित एउटा होटलमा स्थानीय राजबहादुर सुनारमाथि अपशब्द प्रयोग गरी गालीगलौज गरेको भिडियो सामाजिक सञ्जालमा भाइरल भएपछि प्रहरीले गुठीचौर गाउँपालिका–३ की कविता बुढालाई पक्राउ गरेको हो।
जिल्ला प्रहरी कार्यालय जुम्लाका डीएसपी रविनबाबु रेग्मीका अनुसार सार्वजनिक भएको भिडियोमा देखिएको विभेदपूर्ण व्यवहारकै आधारमा उनलाई नियन्त्रणमा लिएर अनुसन्धान थालिएको छ। पीडित पक्षबाट हालसम्म औपचारिक जाहेरी नआए पनि सामाजिक सञ्जालमा देखिएको भिडियोले कानुनी राज्य र सामाजिक मर्यादामाथि प्रश्न उठाएकाले प्रहरीले तत्कालै ‘एक्सन’ लिएको हो। पक्राउ परेकी बुढामाथि जातीय विभेद सम्बन्धी कानुनअनुसार थप अनुसन्धान भइरहेको प्रहरीले जनाएको छ।
