काठमाण्डौं । राष्ट्रिय प्रजातन्त्र पार्टी (राप्रपा)का वरिष्ठ उपाध्यक्ष रविन्द्र मिश्र र ’संयुक्त जनआन्दोलन समिति’ ले तोकेका ’जनकमाण्डर’ दुर्गा प्रसाईंले आइतबार इजलासमाबयान दिएका छन् ।
आइतबार उनीहरू सहित तीनकुने घटनामा पक्राउ परेका व्यक्तिहरूलाई म्याद थपका लागि जिल्ला अदालत काठमाडौंका न्यायाधीश ईश्वरीप्रसाद भण्डारीको इजलासमा उपस्थित गराइएको थियो । उपस्थित गराउँदा दुबै जनाले आ–आफ्ना धारणा राखेका छन् । मिश्रको तर्फबाट वरिष्ठ अधिवक्ताहरू राजु बस्नेत, विष्णु भट्टराई र गोविन्द बन्दीले बहस गरका छन् । बहसका क्रममा उनीहरूले मिश्रलाई हाजिर जमानी÷साधारण तारेखमा रिहा गर्नुपर्ने माग राखेका छन् ।
त्यसबीच मिश्रले आजको इजलासमा पनि आफ्ना धारणा राखेका छन् । मिश्रले आज आमाको मुख हेर्ने दिन भएकाले पनि छाडिपाउँ भनेर अनुरोध गरेका छन् । उनले आफूले कुनै गलत काम नगरेको बताएका छन् ।
मिश्रले भने ‘आमाको कसम खाएर भन्न चाहान्छु मैले कुनै गलत काम गरेको छैन । आज आमाको मुख हेर्ने दिन पनि हो । मुख हेर्न पाऊ,’ उनको भनाइ उदृत गर्दै वरिष्ठ अधिवक्ता बस्नेतले भने, ‘त्यस दिन मैले कुनै कसुर गरेको छैन।’ स्टेजमै अश्रुग्यास प्रहार भएपछि आफू आवेगमा आएको, तर हिंसा भड्काउनमा संलग्न नरहेको उनले बताएका थिए ।
‘स्टेजमा अश्रुग्यास प्रहार भयो । नवराज सुवेदी त्यहीँ हुनुहुन्थ्यो। उहाँको रेस्क्यु गरेँ। त्यहीँ अश्रुग्यास प्रहार भएपछि आवेगमा आएँ। तितिरबितर भएको थियो भीड,’ थप उदृत गर्दै बस्नेतले भने, ‘त्यसपछि आउनुस्, आउनुस् भनेको हुँ। अरू मैले शीर निहुरिने कुनै पनि काम गरेको छैन। तोडफोड, आगजनीमा संलग्न छैन ।’
आइतबार इजलासमा दुर्गा प्रसाईंले पनि धारणा राखेको उनका तर्फबाट वकालत गरेका वरिष्ठ अधिवक्ता टंक दुलालले जानकारी दिए। प्रसाईंको तर्फबाट वरिष्ठ अधिवक्ता सुरेन्द्र भण्डारीले पनि बहस गरेका थिए । ‘म विचारका लागि त्यहाँ पुगेको हुँ । त्यहाँ पुग्नुअगाडि नै घटना भइसकेको थियो,’ प्रसाईंको भनाइ उदृत गर्दै वरिष्ठ अधिवक्ता दुलालले भने ।