मकवानपुर । जिल्ला प्रहरी कार्यालय हेटौँडाले १ करोड ३५ लाख सहित दुई जना पक्राउ गरेको छ । पूर्व–पश्चिम सडक खण्ड अन्तरगत मकवानपुरको हेटौँडा उपमहानगरपालिका वडा नम्बर १५, रातोमाटेबाट अवैध मूल्य बराबरको सामान र ट्रकसहित प्रहरीले दुई जनालाई पक्राउ गरेको हो ।
पक्राउ पर्नेहरूमा चालक भारत, बिहार राज्य, जिल्ला मोतिहारी, थाना तुकालिया, पूर्वी चम्पारण सपही बस्ने वर्ष ३० का जन्दार आलम र सोही स्थानका बन्जरिया पूर्वी चम्पारण चौलाहा कलोनी बस्ने वर्ष १९ का मुना मिया रहेको जिल्ला प्रहरी कार्यालय मकवानपुरका प्रहरी उपरीक्षक सिताराम रिजालले जानकारी दिए ।
प्रहरी उपरीक्षक रिजालका अनुसार, असोज २ गते सुनसरीबाट हेटौडा हुँदै काठमाडौँ जाँदै गरेको बी.आर. ०५ जी.डी. १३४३ नम्बरको भारतीय ट्रकलाई रोकी चेकजाँच गरिएको थियो । सो क्रममा ट्रकमा ३४५ बोरा आलुको भन्सार बिल काटेर प्रति बोरा ५० किलोको दरले २६४ बोरा आलु राखी सोको भित्री भागमा लुकाई छिपाई गरी ७४ बोरा विभिन्न किसिममा लत्ताकपत्ता (कुर्ता, रोलसहितको सर्ट एवम् पाईन्ट) को कपडाहरू ल्याएको पाइएको प्रहरी उपरीक्षक रिजालले बताए ।
बरामद अवैध सामान र भारतीय ट्रक गरी १ करोड ३५ लाख मूल्य बराबरको भएको प्रहरी उपरीक्षक रिजालले बताए ।
पक्राउ परेका उनीहरूलाई बरामद सामान र ट्रकसहित आवश्यक अनुसन्धान तथा कारबाहीको लागि राजश्व अनुसन्धान कार्यालय पथलैया बारा पठाउने तयारी भइरहेको प्रहरी उपरीक्षक रिजालले बताए । उनका अनुसार, पक्राउ परेकामध्ये जन्दार आलम ट्रक चालक र मुना मिया सहचालक हुन् ।
