युबराज श्रेष्ठ
सिन्धुली । सिन्धुलीको गोलन्जोर गाउँपालिका वडा नम्बर ६ घोक्सिला खोलामा (मोटरेबल)पक्की पुलको शिलान्यास भएको छ । सोमबार गाउँपालिका अध्यक्ष शंकर राज बरालले ९ करोड ४५ लाख ३७ हजार १ सय २४ रुपैंयाको लागतमा निर्माण हुने पुलको शिलान्यास गर्नु भएको हो ।
गाउँपालिका अध्यक्ष बरालले पुलको शिलान्यास कार्यक्रमलाई सम्बोधन गर्दै गाउँपालिका भित्रका घोक्सिला, छेत्पा सहित वैकल्पिक मार्ग हुँदै नयाँखर्क, नाकाजोली र हैबार जोड्ने यो पुलले पालिकाका भित्रका नागरिकलाई ठुलो राहत मिलेको बताउनु भयो । वर्षा याममा आवत जावत गर्न त्यस क्षेत्रको नागरिकलाई धेरै समस्या थियो र झेल्दै आइरहनु भएको थियो अब यो पुल बने सँगै बाह्रै महिना सहज रूपमा आवत जावत गर्न सकिने बताउनु भयो ।
गाउँपालिका अध्यक्ष बरालले आफू गाउँपालिका अध्यक्ष बनेको दिन देखी बागमती प्रदेश सरकारसँग पुल निर्माणका लागी अहोरात्र लागी परेको कारण आज सम्भव भएको बताउनु भयो ।’अध्यक्ष बरालले भने“ यो स्थानमा पुल नहुँदा घोक्सिला, छेत्पा सहित विभिन्न स्थान जान आउन ठुलो समस्या थियो । जब म निर्वाचित भए त्यस दिन देखी यो स्थानमा पुल बनाउन पर्छ भनेर लागी परे आज आएर त्यसको परिणाम स्वरूप पुल बन्ने भएको बताउँदै खुसी समेत व्यक्त गर्नु भयो ।
साथै गाउँपालिका अध्यक्ष बरालले पुलको अपरिहार्यता र आवश्यकतालाई मध्यनजर गर्दै छिटो भन्दा छिटो गुणस्तरीय पुल निर्माण गर्न निर्माण कम्पनीलाई ध्यानाकर्षण समेत गराउनु भएको छ । ‘यो क्षेत्रको जनताको लागि पुलको आवश्यकतालाई ख्याल गरेर छिटो पुल निर्माण गर्नुहोला । निर्माण कम्पनीतर्फ लक्षित गर्दै उहाँले भन्नु भयो ‘पुल बनाउने मात्र होइन गुणस्तरीय पनि बनाउनुपर्छ, त्यसमा पनि ख्याल गर्नुहोला ।’
बागमती प्रदेश भौतिक पूर्वाधार मन्त्रालय अन्तर्गत पूर्वाधार विकास कार्यालय सिन्धुली र श्रृजना निर्माण सेवा, सिन्धुली २०८१ जेठ १४ गते नौ करोड ४५ लाख ३७ हजार १ सय २४ रुपैयाँ ८० पैसा सम्झौता भएको थियो । ७० मिटरको मोटरेवल पुल निर्माण कार्य आगामी १८ महिनाभित्र सम्पन्न हुनेछ ।
शिलान्यास कार्यक्रममा गाउँपालिकाका उपाध्यक्ष ज्वाला प्रसाद न्यौपाने, प्रमुख प्रशासकीय अधिकृत चन्द कान्त चौधरी, एमाले जिल्ला कमिटी सदस्य ओम प्रकाश बराल, श्रृजना निर्माण सेवा प्रतिनिधि उद्धव दाहाल लगायतका व्यक्तिहरूको सहभागिता रहेको थियो ।
