युबराज श्रेष्ठ
काठमाडौं । सिन्धुलीको गोलन्जोर गाउँपालिकाका दुई विद्यालयका बिद्यार्थीहरुलाई ब्याक टु लाइफ ई भी जर्मनीको आर्थिक सहयोग र सिएसडिएस सिन्धुलीको साझेदारीमा न्यानो कपडा र शैक्षिक सामाग्री वितरण गरिएको छ । गाउँपालिका–४ मा रहेको श्री प्राथमिक विद्यालय ट्वाङ्ट्वाङेमा र गाउँपालिका– ३ मा रहेको कुशेश्वर प्राथमिक विद्यालयमा अध्ययनरत बालबालिकाहरूलाई न्यानो कपडा ज्याकेट र टोपी तथा शैक्षिक सामाग्री (कापी, कलम आदि) वितरण गरिएको छ । उनीहरूलाई पालिका अध्यक्ष र सम्बन्धित वडा अध्यक्षको उपस्थितिमा सामान वितरण गरिएको हो ।
चिसो समयमा बिद्यार्थीहरुलाई विद्यालय जान समस्या हुने र विद्यालय जान अधिकांश विद्यार्थी नमान्ने जस्ता समस्या रहेको बताउँदै सानो सहयोगले विद्यार्थीलाई हौसला मिल्ने टु लाईफका डिकेन्द्र ढकालले जानकारी दिनु भयो ।
गाउँपालिकाका अध्यक्ष शंकरराज बरालले गोलन्जोर गाउँपालिकालाई कार्यक्षेत्र बनाई सञ्चालन गरिरहेको खानेपानी योजना पालिका स्तरीय अस्पताल, स्वास्थ्य चौकी र विद्यालय भवन निर्माण गर्न लागिएकोमा गोलन्जोर बासी समुदाय आफ्नो व्यक्तिगत तर्फबाट दातृ निकाय ब्याक टु लाइफ तथा साझेदारी संस्था सि एस डी एसलाई धन्यवाद दिए । त्यस्तै वडा नम्बर ३ का अध्यक्ष कृष्ण प्रसाद पोख्रेलले गाउँपालिकाको स्वास्थ्य शिक्षा र खानेपानीमा लागि धेरै नै ठुलो सहयोग हुने र पालिकावासीले आ—आफ्नो क्षेत्रबाट निर्माण गरिएका संरचनाहरूको उचित संरक्षण र आवश्यक व्यवस्थापन तथा विद्यालयहरूमा बालबालिकालाई नियमित विद्यालय उपस्थिति गराउन सम्पूर्ण सरोकारवाला र अभिभावकहरू एकजुट भएर लाग्नुपर्ने बताए ।
प्राथमिक विद्यालय ट्वाङ्ट्वाङे र मुर्किबेसीमा रहेको कुशेश्वर प्राथमिक विद्यालयमा ब्याक टु लाइफ ई भी जर्मनीकै आर्थिक सहयोगमा ४ कोठे पक्की शैक्षिक भवन निर्माण भइरहेको छ । आगामी शैक्षिक सत्रदेखि नयाँ भवनबाट पठन पाठन सञ्चालन हुने लक्ष्य राखिएको स्थानीय साझेदार संस्था सिएसडिएसले जानकारी गराएको छ।
