रामेछापको गोकुलगङ्गा गाउँपालिकामा आगामी शनिबार एक दिवसीय ‘निःशुल्क आयुर्वेद स्वास्थ्य शिविर’ सञ्चालन हुने भएको छ । आयुर्वेद तथा वैकल्पिक चिकित्सालय रामेछापको आयोजना तथा गोकुलगङ्गा गाउँपालिका अन्तर्गतको नागरिक आरोग्य सेवा केन्द्र, रस्नालुको संयोजन र सहयोगमा उक्त शिविर सञ्चालन हुन लागेको हो ।
गाउँपालिकाले सार्वजनिक गरेको सूचना अनुसार शिविर आगामी फागुन ३० गते शनिबारका दिन गोकुलगङ्गा वडा नम्बर २, ठोसेस्थित श्री शारदा माध्यमिक विद्यालयको प्राङ्गणमा आयोजना गरिनेछ । बिहान १० बजेदेखि अपराह्न ४ बजेसम्म सञ्चालन हुने यस शिविरमा सहभागी भई स्वास्थ्य लाभ लिन गाउँपालिकाले सम्पूर्ण स्थानीय जनसमुदायमा आग्रह गरेको छ ।
गाउँपालिकाका निमित्त प्रमुख प्रशासकीय अधिकृत नरेन्द्र सिंह भण्डारीका अनुसार गाउँपालिकाका सबै नागरिकलाई आयुर्वेद तथा वैकल्पिक चिकित्सा पद्धतिबाट स्वास्थ्य सेवा प्रदान गर्ने उद्देश्यले यो शिविरको आयोजना गरिएको हो । गाउँपालिकाले सूचनामार्फत आफ्ना सबै वडा कार्यालयहरूलाई समेत शिविरका बारेमा स्थानीय स्तरमा जानकारी गराउन र समन्वय गर्न पत्राचार गरिसकेको छ । ग्रामीण भेगका नागरिकलाई प्रत्यक्ष स्वास्थ्य सेवा पुर्याउने लक्ष्य राखिएको यस शिविरमा ठूलो सङ्ख्यामा स्थानीयको उपस्थिति रहने अपेक्षा गरिएको छ ।
