रामेछाप, असार १०। रामेछापको गोकुलगंगा गाउँपालिकाले १७औँ गाउँसभा तथा अधिवेशनको अवसरमा कक्षा ५ र ८ मा उत्कृष्ट नतिजा ल्याउने विद्यार्थीहरूलाई दोसल्ला ओढाएर, कदरपत्र र नगद राशिसहित सम्मान गरेको छ।
उत्कृष्ट नतिजा ल्याएका विद्यार्थीहरूलाई प्रोत्साहन स्वरूप सम्मान गर्नुका साथै तिनलाई मार्गदर्शन गर्ने शिक्षकहरूलाई समेत कदर पत्र सहित सम्मान गरिएको गाउँपालिकाले जनाएको छ। पालिका स्तरको परीक्षामा उत्कृष्ट नतिजा दिन सफल भएका विद्यालयका विषयगत शिक्षकहरूलाई पनि दोसल्ला र प्रमाणपत्रसहित सम्मान गरियो।
सम्मान कार्यक्रममा गाउँपालिका अध्यक्ष काजी बहादुर खड्का (दिनेश), उपाध्यक्ष उषा देवी कार्की, प्रमुख प्रशासकीय अधिकृत दिनेश भट्टराई लगायतले विद्यार्थी र शिक्षकहरूलाई बधाई दिँदै आगामी दिनमा अझ उत्कृष्ट परिणाम ल्याउने अपेक्षा व्यक्त गरे।
अध्यक्ष खड्काले यसप्रकारको सम्मानले विद्यार्थी र शिक्षक दुवैलाई हौसला प्रदान गर्ने र शैक्षिक गुणस्तरमा सकारात्मक परिवर्तन ल्याउने विश्वास व्यक्त गर्नुभयो। उपाध्यक्ष कार्कीले शिक्षा क्षेत्रमा अझ प्रभावकारी योजना ल्याएर गोकुलगंगालाई शैक्षिक दृष्टिले नमुना बनाउन सबैको साथ र सहयोगको अपेक्षा व्यक्त गर्नुभयो।
