रामेछाप, असार १०। रामेछापको गोकुलगंगा गाउँपालिकाले आर्थिक वर्ष २०८२/८३ का लागि कुल ५६ करोड ८ लाख १४ हजार १७ रुपैयाँको बजेट सार्वजनिक गरेको छ। मंगलबार गाउँपालिकाको सभाहलमा सम्पन्न १७औं गाउँसभा अधिवेशनमा गाउँपालिका उपाध्यक्ष उषा देवी कार्कीले नीति, कार्यक्रम र बजेट प्रस्तुत गर्नुभएको हो।
बजेट अनुसार आन्तरिक स्रोतबाट जम्मा ४ करोड ५१ लाख ५८ हजार ५ सय ४५ रुपैयाँ मात्र संकलन हुने अनुमान गरिएको छ, जुन कुल बजेटको करिब आठ प्रतिशत मात्रै हो। संघीय सरकारको वित्तीय हस्तान्तरण र राजस्व बाँडफाँटबाट ४२ करोड २९ लाख १५ हजार ८ सय ७३ रुपैयाँ प्राप्त हुने अनुमान छ भने प्रदेश सरकारबाट १० करोड ७ लाख १३ हजार रुपैयाँ प्राप्त हुने अपेक्षा गरिएको छ।
संघीय र प्रदेश सरकारबाट अन्तरसरकारी अधिकार अन्तर्गत प्राप्त हुने करिब १२ करोड रुपैयाँ बजेट सिधै खर्च र लेखांकनमा प्रयोग गरिने जनाइएको छ। उक्त रकम संचित कोषमा नराखी प्रत्यक्ष कार्यान्वयन गरिने व्यवस्था गरिनेछ।
गाउँपालिकाले बजेटमा शिक्षा, स्वास्थ्य, कृषि, पूर्वाधार, सहकारी, तथा रोजगारी सिर्जनामा विशेष प्राथमिकता दिएको छ। पारदर्शिता, जवाफदेहिता र स्थानीय स्रोत परिचालनमा सुधार ल्याउने प्रतिबद्धता बजेटमार्फत व्यक्त गरिएको छ।
