रामेछाप । रामेछाप जिल्लाको गोकुलगंगा गाउँपालिका यस वर्षको स्थानीय तह संस्थागत क्षमता स्वमूल्याङ्कन (लिजा) मा जिल्लामै पहिलो स्थानमा उक्लिन सफल भएको छ। संघीय मामिला तथा सामान्य प्रशासन मन्त्रालयले शुक्रबार सार्वजनिक गरेको आर्थिक वर्ष २०८०/८१ को नतिजा अनुसार गोकुलगंगाले ८२ अंक प्राप्त गर्दै अग्रस्थानमा पुगेको हो। अघिल्लो वर्ष अर्थात् २०७९/८० मा यो गाउँपालिकाले ४६ अंक मात्रै पाएको थियो, तर निरन्तर सुधार र योजनाबद्ध प्रयासका कारण यसपटक दुइ गुना भन्दा बढी अंक जोड्दै सबै स्थानीय तहलाई पछि पार्न सफल भएको हो।
गोकुलगंगाको यो प्रगति जिल्लाका अन्य पालिकाहरूसँग तुलना गर्दा अझ स्पष्ट देखिन्छ। मन्थली नगरपालिकाले ८१.२५ अंक प्राप्त गर्दै दोस्रो स्थानमा पुगेको छ। अघिल्लो वर्ष ७४.५० अंकमै सीमित रहेको मन्थलीले यसपटक पनि अंकमा सुधार गरेको छ। सोही वर्ष ७४.२५ अंक पाएको सुनापति गाउँपालिकाले पनि यो वर्ष ७९.५० अंक प्राप्त गर्दै तेस्रो स्थानमा आफूलाई स्थापित गरेको छ।
जिल्लाको पुरानो नगर रामेछाप नगरपालिका भने यसपटक पछाडि परेको छ। अघिल्लो वर्ष ७१.५० अंक ल्याएको यो नगरपालिकाले २०८०/८१ मा ६६.५० अंक मात्र प्राप्त गर्न सक्यो, जसका कारण चौथो स्थानमा सीमित रह्यो। उमाकुण्ड गाउँपालिकाको अवस्थासमेत यस्तै देखिएको छ। २०७९/८० मा ७० अंक ल्याएको यस गाउँपालिकाले यो वर्ष ६३ अंक मात्र जोड्न सक्यो र पाँचौँ स्थानमा झर्यो।
त्यसपछिका तहमा खाँडादेवी गाउँपालिका छ, जसले ६२.७५ अंक प्राप्त गर्दै अघिल्लो वर्षको तुलनामा आफ्नो स्थिति सुधार गर्न सफल भएको छ। लिखुतामाकोशी गाउँपालिकाले पनि अघिल्लो वर्षका ४७.७५ अंकलाई बढाउँदै यसपटक ५६ अंक जोडी सातौँ स्थान सुरक्षित गरेको छ। तर, अघिल्लो वर्ष ६१.२५ अंक ल्याएको दोरम्बा शैलुङ गाउँपालिकाको नाम भने मन्त्रालयले यसपटकको सूचिमा समावेश नै गरेन।
जिल्लामै पहिलो भएको गोकुलगंगा गाउँपालिकाका अध्यक्ष काजी बहादुर खड्का ‘दिनेश’ ले यो नतिजा आफूहरूका प्रयासहरूको प्रतिफल भएको प्रतिक्रिया दिएका छन्। उनले निरन्तर रूपमा गर्ने कामको सही मूल्याङ्कन भएकाले यसले आफू र आफ्नो टोलीलाई थप ऊर्जा प्रदान गरेको बताए। सुशासन, पारदर्शिता र जवाफदेहितालाई प्राथमिकतामा राख्दै नागरिकका अपेक्षालाई पूरा गर्ने काममै जोड दिँदै आएको गाउँपालिकाले यसपटक त्यसकै परिणाम स्वरूप यस्तो उपलब्धि हासिल गरेको उनको भनाइ छ।
स्थानीय तहको संस्थागत क्षमता स्वमूल्याङ्कनमा शासकीय प्रबन्ध, संगठन र प्रशासन, वार्षिक बजेट तथा योजना व्यवस्थापन, वित्तीय र आर्थिक व्यवस्था, सेवा प्रवाह, न्यायिक कार्य सम्पादन, भौतिक पूर्वाधार, सामाजिक समावेशीकरण, वातावरण संरक्षण र विपद् व्यवस्थापन, सहकार्य र समन्वय जस्ता सूचकलाई आधार मानिन्छ। यी सबै क्षेत्रमा देखिएको सुधारका कारण गोकुलगंगा गाउँपालिका यसपटक जिल्लामा पहिलो बन्न सफल भएको छ।
