रामेछाप जिल्लाको मन्थली नगरपालिका–६ की चाहना प्रधान मिस ग्रान्ड नेपाल २०२५ मा प्रभावशाली उपस्थिति जनाउँदै, विजेताको पहिलो दावेदारको रूपमा अगाडि बढिरहेकी छन्। आत्मविश्वास, सशक्त अभिव्यक्ति, सौन्दर्य र प्रतिभाको संगमले उनले प्रारम्भिक चरणबाटै निर्णायकहरूको ध्यान तानेकी छन्।
विशेष कुरा के छ भने, चाहना केवल सौन्दर्य प्रतियोगिताकी प्रतिस्पर्धी मात्र होइनन्—उनी एक सफल उद्यमी पनि हुन्। उनले स्थापना गरेको ‘Chahana Food Product’ रामेछापमै सञ्चालनमा छ, जसअन्तर्गत विभिन्न स्वादिलो अचारहरू उत्पादन तथा बिक्री गरिन्छ।
कृषि विषयमा डिप्लोमा अध्ययन पूरा गरेकी चाहना गाउँको परिवेशबाट उठेर राष्ट्रिय मञ्चमा उभिँदा आफ्नो सामाजिक र आर्थिक सशक्तीकरणको कथा पनि साथ लिएर आएकी हुन्। उनका बुबा राजु प्रधान र आमा सपना प्रधानको साथ र प्रेरणाले उनी सौन्दर्य र व्यवसाय दुवै क्षेत्रमा सशक्त उभिएको देखिन्छ।
३५ दिने प्रशिक्षणमा सहभागी हुँदै ग्रान्ड फिनालेतर्फ अघि बढिरहेकी चाहनाले मिस ग्रान्ड नेपालको उपाधि जितेमा नगद पुरस्कार, EV स्कूटर, ‘गुडविल एम्बासडर’को मान, चलचित्र अभिनयको अवसर र अन्तर्राष्ट्रिय प्रतियोगितामा नेपालको प्रतिनिधित्व गर्ने सुनौलो मौका प्राप्त गर्नेछिन्।
आजका दिन, धेरैले चाहनालाई “ग्ल्यामर र घाम–दुवैमा चम्कने युवती” का रूपमा चिनाउन थालेका छन्। मिस ग्रान्ड नेपालमा भाग लिनु र आफ्नै उद्यमलाई बढाउनु सँगै उनले नेपाली युवापुस्तालाई सन्देश दिएकी छन्—
“सौन्दर्य केवल देखावटी होइन, आत्मनिर्भरता र दृष्टिकोण पनि हो।”
