रामेछाप । घरेलु कच्चा पदार्थ खोस्टा र परालबाट चकटी, विभिन्न प्रकारका अर्कषक फूल तथा जुत्ता बनाउने १७ दिने सीपमूलक तालिम सम्पन्न भएको छ ।
मन्थली नगरपालिका–११ का २० जना महिलाहरुलाई खोस्टाको चकटी र फूल साथै परालबाट जुत्ता बनाउने १७ दिने सीपमूलक तालिम वडा कार्यलय संगको सहकार्यमा मन्थली नगरपालिकाले १७ दिन अघि सुरु गरेको थियो उक्क्त तालिम आज सम्पन्न गरेको छ ।
स्थानीय स्रोत साधनको उपयोग गर्दै स्वरोजगार सिर्जना र महिलाहरूलाई आत्मनिर्भर बनाउने उद्देश्यले मन्थली नगरपालिकाले उक्त तालिम दिएको हो । “स्थानीय स्रोत साधनको प्रयोग गरी लघु उद्यम विकास कार्यक्रम” अन्तर्गत सञ्चालित तालिममा सहभागीहरूले मकैको खोस्टाबाट चकटी तथा फूल र परालबाट जुत्ता बनाउने सीप सिकेका छन् ।
मन्थली नगरपालिकाकी उपप्रमुख इश्वरी बस्नेतले सहभागीहरूलाई तालिममा सिकेका सीपहरू व्यवहारमा प्रयोग गरी उत्पादनमा लाग्न आग्रह गर्नुभयो। उहाँले भन्नुभयो, “महिलाहरूलाई आत्मनिर्भर बनाउन मन्थली नगरपालिकाले यस्तो तालिम सञ्चालन गरेको हो । अब तपाईंहरू आफैंले उत्पादन गरेर आम्दानी गर्न सक्नुहुन्छ ।”
उपप्रमुख बस्नेतले नगरपालिकाले भविष्यमा पनि यस्ता सीपमूलक तालिम सञ्चालन गर्दै महिलालाई सशक्त बनाउने कार्यलाई प्राथमिकता दिने बताउनुभयो । साथै, उत्पादनलाई बढावा दिन नगरपालिकाको तर्फबाट सकेसम्म सहयोग गरिने प्रतिबद्धता व्यक्त गर्नुभयो ।
त्यस्तै, मन्थली नगरपालिका–११ का वडा अध्यक्ष भीमबहादुर थापा मगरले तालिममा सिकेका सीपहरूको प्रयोग गरी स्वरोजगारमा लाग्न इच्छुक महिलाहरूलाई वडाबाट आवश्यक सहयोग गर्न तयार रहेको बताउनुभयो । उहाँले महिलाहरूलाई आत्मनिर्भर बनाउन यस्ता सीपमूलक तालिमहरू प्रभावकारी हुने विश्वास व्यक्त गर्नुभयो ।
तालिममा तयार पारिएका चकटी र जुत्ताहरूको नमुना प्रदर्शनीसमेत गरिएको थियो। सहभागीहरूले तालिम अत्यन्त उपयोगी भएको प्रतिक्रिया दिँदै उत्पादनको निरन्तरताका लागि यस्ता तालिम नियमित सञ्चालन हुनुपर्नेमा जोड दिएका छन् ।