रामेछाप । मन्थली नगरपालिका वडा नं ११ गेलु प्राथमिक स्वास्थ्य केन्द्रमा रहेको बिरामी बोक्ने एम्बुलेन्स नै बिरामी परेर थन्किएपछि गेलुका नागरिकहरु एम्बुलेन्स सेवा लिनवाट बञ्चित भएका छन् ।
मन्थली नगरपालिका वडा नं ११ गेलु वडा कार्यालय मार्फत २०७५ सालवाट सञ्चालनमा आएको एम्वुलेन्स बिग्रीएर थन्किएपछि स्थानिय नागरिकहरुले सास्ती खेप्न वाध्य भएका हुन् । गाउँमा भएको एउटा मात्र एम्वुलेन्स त्यो पनि बिग्रीएपछि प्राथमिक स्वास्थ्य केन्द्र गेलुमा उपचार नहुने गम्भिर प्रकृतिका बिरामीलाई रिफर गर्दा उनीहरुले महङ्गो मूल्य पैसा तिरेर सवारीसाधन भाडामा लिएर उपचार गर्न जानु पर्ने वाध्यता रहेको छ ।
गाउँमा भएको एउटा एम्वुलेन्स बिग्रीएर थन्किएको लामो समय हुँदासमेत मर्मत सम्भार नहुँदा नागरिकहरुले धेरै दुःख खेप्नु परेको मन्थली नगरपालिका वडा नं ११ गेलुका सागर बोहोराले जानकारी दिए । उनले भने– भएको एम्बुलेन्स बिग्रीएर बसेको छ । बिरामी परेको बखत गाउँमा सबारीसाधन हुँदैनन् । सदरमुकाम मन्थलीवाट साधन मगाउनु पर्दा धेरै खर्चिलो हुने हुन्छ । जसले गर्दा सर्वसाधारण नागरिकलाई धेरै मार परेको छ ।
एम्बुलेन्स बिग्रीएर बसेको दुई महिना भन्दा बढि भएको मन्थली नगरपालिका वडा नं ११ गेलुका अध्यक्ष भिमबहादुर मगरले जानकारी दिए । उनले भने– बिग्रीएको एम्वुलेन्स मर्मत गर्न आवश्यक पर्ने सामान जिल्लामा पाइएन । अन्यत्र सामाग्री खोज्दा समेत कोरोना महामारीका कारण सामान नपाएकाले मर्मत सम्भार नभएको हो । अब चाँडै एम्वुलेन्स मर्मत सम्भार गरेर संचालनमा ल्याइने अध्यक्ष मगरले बताए ।
