बिरामी बोक्ने एम्बुलेन्सको दुरुपयोग गर्दै गाँजा तस्करी भइरहेको विशेष सूचनाका आधारमा धरानमा ठुलो परिमाणको अवैध लागुऔषध बरामद गरिएको छ । धरान उपमहानगरपालिका–१३ स्थित सडक खण्डमा मंगलबार राति इलाका प्रहरी कार्यालय धरानको टोलीले नियमित जाँचका क्रममा सो सफलता हात पारेको हो ।
को १ च ७३५९ नम्बरको एम्बुलेन्सलाई शङ्का लागि रोक्न खोज्दा चालकले सवारी छाडेर फरार भएपछि प्रहरीले खानतलासी गरेको थियो । सो क्रममा एम्बुलेन्सभित्र प्लाष्टिकका बोरामा प्याक गरी राखिएको ४४० किलोग्राम गाँजा फेला परेको सुनसरी प्रहरीले जनाएको छ । बरामद गरिएको सो परिमाणको गाँजा र एम्बुलेन्सलाई नियन्त्रणमा लिई थप अनुसन्धान अगाडि बढाइएको छ ।
प्रारम्भिक अनुसन्धानका क्रममा उक्त एम्बुलेन्स धरानस्थित बुढासुब्बा डाइग्नोष्टिक सेन्टर प्रालिद्वारा सञ्चालन हुँदै आएको खुलेको छ । फरार चालक र घटनामा संलग्न अन्य व्यक्तिहरूको खोजी कार्यलाई तीव्र पारिएको प्रहरीको भनाइ छ । जिल्ला प्रहरी कार्यालय सुनसरीले लागुऔषधको ओसारपसार र कारोबार गम्भीर अपराध भएकाले यस्ता गतिविधिमा संलग्न नहुन सर्वसाधारणलाई सचेत समेत गराएको छ ।
