रामेछाप । नेकपा एमाले रामेछापका उम्मेदवारहरुले तामझामका साथ मुख्य निर्वाचन कार्यालयमा मनोनयन दर्ता गराई सकेका छन् । नेपाली कांग्रेसले भने दिउसो ४ बजे पछी मनोनयन दर्ता गर्ने तयारी भएको नेपाली कांग्रेसका जिल्ला सचिब दिपक खड्काले जानकारी दिए ।
आइतबार मध्यान्ह् सदरमुकाम मन्थलीमा रहेको मुख्य निर्वाचन कार्यालय पुगेर प्रतिनिधिसभा सदस्यका लागि कैलाश प्रसाद ढुङ्गेल, प्रदेशसभा सदस्य “क” मा शान्ति प्रसाद पौडेल र प्रदेश “ ख” मा मिलनकुमार घिसिङले मनोनयन दर्ता गराई सकेका छन् । एमालेका केन्द्रीय सदस्य समेत रहेका ढुङगेल बागमती प्रदेशका निवर्तमान आर्थिक मामिला तथा योजना मन्त्री र एमाले रामेछापको जिल्ला ईन्चार्ज हुन । पौडेल बागमती प्रदेशको पूर्व उद्योग पर्यटन वन तथा वातावरण मन्त्री समेत हुन । घिसिङ एमाले रामेछापको जिल्ला कमिटी सदस्य हुन ।
रामेछापमा गठबन्धबाट नेपाली कांग्रेस जिल्ला सभापति पूर्णबहादुर तामाङ (कान्छाराम) ले प्रतिनिधिसभा सदस्यमा मनोनयन दर्ता गराउँदै छन् । तामाङ यसअघिको प्रतिनिधिसभा सदस्यमा उठेर तत्कालिन गठबन्धनका उम्मेदवार श्याम कुमार श्रेष्ठसँग पराजित भएका थिए । तर सोहि दल संग यस पटक कांग्रेसको गठबन्धन रहेको छ ।
प्रदेशसभा सदस्य “क” मा नेकपा माओवादी केन्द्रबाट पूर्व संविधानसभा सदस्य हालका रामेछाप पार्टी सचिव तारानारायण श्रेष्ठ र प्रदेश “ख” मा माओवादी केन्द्रका पोलिटब्यूरो सदस्य युवराज चौलगाईले मनोनयन दर्ता गराउँदै छन् । गठबन्धनका उम्मेदवारले अपरान्ह् ४ बजे मनोनयन दर्ता गर्ने तयारी गरेको छ । गठबन्धनमा रहेको नेकपा एकीकृत समाजवादीले भने दुई प्रदेशसभा सदस्य र एक प्रतिनिधि सभा सदस्यमा छुट्टै मनोनयन दर्ता गराउने तयारी गरेको छ ।
