काठमाडौं, १४ भदौ । पूर्वराष्ट्रपति विद्यादेवी भण्डारी वीरगञ्ज उद्योग वाणिज्य संघले आयोजना गरेको वृहत महिला सम्मेलनमा सहभागी हुन शनिबार वीरगञ्ज पुगेकी छन्।
भण्डारी सिमरा विमानस्थलमा अवतरण गरेलगत्तै एमालेका स्थानीय नेताकार्यकर्ताले करिब १५ किलो तौलको मालाले स्वागत गरेका थिए। त्यसपछि उनी गाडीमार्फत वीरगञ्ज प्रस्थान गरिन्।
यद्यपि, नेकपा (एमाले) केन्द्रीय नेतृत्वले कार्यक्रम बहिष्कार गर्न निर्देशन दिएको थियो। तर निर्देशनको अवज्ञा गर्दै स्थायी कमिटी सदस्य मुकुन्द न्यौपाने, पोलिटब्युरो सदस्य पुरुषोत्तम पौडेल, सचिवालय सदस्य जय प्रकाश थारु, केन्द्रीय सदस्य केदार न्यौपाने, अरविन्द सिंह, मधेश प्रदेश सचिव मनोज पौडेल, वीरगञ्ज महानगर अध्यक्ष नवराज शर्मा, जितपुर सिमरा उपमहानगरपालिकाका उपमेयर भोलाप्रसाद अधिकारीलगायत नेताहरू विमानस्थलमै उपस्थित भई भण्डारीलाई स्वागत गरेका थिए।
भण्डारीको मधेश आगमनसँगै एमालेभित्रको आन्तरिक असन्तुष्टि फेरि सतहमा आएको देखिएको छ। पार्टीले आधिकारिक रूपमा कार्यक्रममा सहभागी नहुन भने पनि स्थानीय नेताकार्यकर्ताले देखाएको समर्थनलाई राजनीतिक रूपमा महत्त्वपूर्ण संकेतका रूपमा हेरिएको छ।
