काठमाडौं । नेकपा एमालेको दोस्रो विधान महाधिवेशनमा २३९२ जना सहभागी हुने भएका छन्। आगामी भदौ २० देखि २२ गतेसम्म गोदावरीस्थित सनराइज हलमा हुने महाधिवेशनका लागि आजदेखि औपचारिक ‘काउन्ट–डाउन’ सुरु गरिएको छ।
संगठन विभागले प्रस्तुत गरेको प्रतिवेदनअनुसार सहभागीमध्ये २१२८ जना प्रतिनिधि र २६४ जना आयोजक रहनेछन्। २०७८ सालमा चितवनमा सम्पन्न १०औँ राष्ट्रिय महाधिवेशनका प्रतिनिधिहरूलाई नै यसपटक विधान महाधिवेशनका प्रतिनिधि बनाइएको हो। यसकारण कतिपय केन्द्रीय सदस्य आयोजकको रूपमा मात्र सहभागी हुनेछन्। सहभागीहरूलाई डिजिटल कार्ड उपलब्ध गराइनेछ।
महाधिवेशनलाई भव्य बनाउन सातदोबाटोदेखि महाधिवेशन स्थलसम्म विभिन्न स्वागतद्वार बनाइने निर्णय गरिएको छ। वाग्मती प्रदेश, ललितपुर जिल्ला कमिटी, स्थानीय संरचना र जनसंगठनहरूले स्वागतद्वार निर्माण गर्नेछन्।
त्यसैगरी महाधिवेशनस्थलमा ३०० भन्दा बढी स्वयंसेवक परिचालन गरिनेछ। सञ्चारमाध्यमका लागि व्यवस्थित न्युज डेस्क स्थापना र रिर्पोटिङ पास वितरण गर्ने तयारी पनि भइरहेको छ। स्वास्थ्य सुरक्षाका लागि चिकित्सकसहितको स्वास्थ्य परीक्षण डेस्क तीन सिफ्टमा सञ्चालन गरिनेछ।
एमालेले भदौ १० गतेसम्ममा मातहतका कमिटीबाट विधानसम्बन्धी सुझाव संकलन गर्नेछ। त्यसपछि तयार हुने राजनीतिक प्रतिवेदन अध्यक्ष एवं प्रधानमन्त्री केपी शर्मा ओलीले पेस गर्नेछन्। विधान संशोधन प्रस्ताव उपाध्यक्ष एवं उपप्रधानमन्त्री विष्णुप्रसाद पौडेलले र सांगठनिक प्रतिवेदन महासचिव शंकर पोखरेलले प्रस्तुत गर्नेछन्।
महासचिव पोखरेलले व्यवस्थापन समितिको बैठकलाई सम्बोधन गर्दै महाधिवेशनलाई नीति–विधि तय गर्ने महत्त्वपूर्ण अवसरका रूपमा चित्रण गर्दै सबैलाई गम्भीरतापूर्वक तयारीमा जुट्न आह्वान गरेका छन्।
