रामेछाप । नेकपा एमाले बागमती प्रदेश कमिटीको अध्यक्षमा रामेछापका प्रभावशाली नेता कैलाश ढुङ्गेलको दाबी रहेको छ । बागमती प्रदेश कमिटीको अध्यक्षमा ढुङ्गेलको सम्भावना बन्दै गएको एमाले स्रोतले समेत बताएको छ ।
नेकपा एमालेका केन्द्रीय सदस्य एवं भक्तपुर जिल्ला इन्चार्जको जिम्मेवारी समेत सम्हाल्दै आएका ढुङ्गेलको उम्मेदवारी स्वाभाविक भएको स्रोतको भनाई छ । अध्यक्षका अन्य दावेदार भन्दा ढुङ्गेलको सम्भावना बलियो बन्दै गएको समेत स्रोतको दाबी छ । ढुङ्गेलले असोज ८ र ९ गते काठमाडौँ हुने एमाले बागमती प्रदेश अधिवेशनमा अध्यक्षको उम्मेदवारी दिने तयारी गरेका छन् ।
बागमती प्रदेशको पूर्व आर्थिक मामिला मन्त्री बन्दा पार्टीको छवि राम्रो बनाएको कारण समेत ढुङ्गेलको विरुद्ध अन्य उम्मेदवार नहुने उनी निकट नेताहरूको भनाई छ । ढुङ्गेल २०४८ बाट लगातार तीन पटक रामेछापको पार्टी सचिव र २०६६ मा जिल्ला पार्टी अध्यक्ष हुँदै २०५४ सालमा तत्कालीन जिल्ला विकास समिति रामेछापको सभापति भएका थिए ।\
२०७४ मा बागमती प्रदेशसभा सदस्य बनेका उनले बागमती प्रदेशको पहिलो आर्थिक मामिला मन्त्री बन्दै प्रदेशको विकासको प्राथमिकता सहितको नीति तथा कार्यक्रम र बजेट निर्माण गर्न अहम् भूमिका खेलेका थिए ।
अध्यक्षमा ढुङ्गेलसँगै एमालेका केन्द्रीय सदस्य कृष्णप्रसाद दाहाल वाग्मती प्रदेश कमिटीका वर्तमान अध्यक्ष केशव पाण्डे र बाग्मती प्रदेशका पूर्व सभामुख सानु श्रेष्ठले पनि एमाले बागमती प्रदेशको अध्यक्षमा उम्मेदवारी दिने तयारी गरेका छन् ।पार्टीको आवश्यकता अनुसार आफूले अध्यक्ष पदमा उम्मेदवारी दिने तय गरेको ढुङ्गेलले बताए । उनले भने,‘मलाई पार्टीले दिएको जिम्मेवारी प्रतिबद्ध भएर पूरा गर्दै आएको छु, बागमती प्रदेश कमिटीको अध्यक्ष भएर एक पटक काम गर्ने चाहना छ ।’
