रामेछाप । एकीकृत फ्रेण्डसिप बचत तथा ऋण सहकारी संस्था राष्ट्रसेवक सेवा केन्द्र मन्थलीको नवौँ साधारण सभा मन्थलीमा सम्पन्न भएको छ । शनिवार मन्थलीमा सम्पन्न सहकारीको नवौँ साधारण सभामा बोल्दै मन्थली नगरपालिका प्रमुख लव श्रेष्ठले स्थानीय तह सँग सहकार्य गर्न आग्रह गरेका छन् ।
नगरपालिका भित्र रहेका सहकारीहरूलाई आफ्नो गतिविधि बारे नगरमा समन्वय गर्न नगरप्रमुख श्रेष्ठले आग्रह गरेका हुन् । सहकारी विकासको एउटा खम्बा भएको भन्दै नगर समृद्ध नगर बनाउन महत्त्व पूर्ण भूमिका एकीकृत फ्रेण्डसिप बचत तथा ऋण सहकारी संस्था राष्ट्रसेवक सेवा केन्द्र मन्थलीले खेल्नेमा आफू विश्वस्त रहेको बताए ।
दोलखा जिल्लाको जिरी नगरपालिकामा मुख्य कार्यालय स्थापना गरी रामेछाप र दोलखा जिल्लाका विभिन्न स्थानमा सेवा विस्तार गरी सेवा दिँदै आएको सहकारीका अध्यक्ष भूमिराज खड्काले बताएका छन् । १६ हजार भन्दा बढी सेयर सदस्य रहेको सहकारीले १ अर्ब ३३ करोड भन्दा बढी कारोबार गर्न सफल भएको अध्यक्ष खड्काले बताएका छन् । साथै सहकारीले आर्थिक वर्ष ०७९÷०८० मा मात्र १ करोड २६ लाख भन्दा बढी मुनाफा कमाउन सफल भएको भन्दै सम्पूर्ण सदस्य तथा कर्मचारीहरूलाई धन्यवाद समेत ज्ञापन गरेका छन् ।
