काठमाडौं – मानव बेचबिखन अनुसन्धान ब्यूरोले भारतमा ५ जना नेपालीको मिर्गौला बेचिएको तथ्य सार्वजनिक गरेको छ। सो घटनामा संलग्न गिरोहका मुख्य नाइके श्याम कृष्ण भण्डारी र उनका सहयोगी सुजन भारतीलाई प्रहरीले नियन्त्रणमा लिएको छ।
प्रहरीका अनुसार, गिरोहले सिन्धुपाल्चोक, काभ्रे, सिन्धुली, नुवाकोट र धादिङका नागरिकलाई विभिन्न प्रलोभनमा पारी भारतको नयाँदिल्ली लगेर मिर्गौला बेच्ने गरेको खुलासा भएको छ। भण्डारी र भारतीलाई भारतबाट नेपाल फर्कँदै गर्दा नाकाबाटै पक्राउ गरिएको थियो।
मानव बेचबिखन अनुसन्धान ब्यूरोमा उक्त गिरोहविरुद्ध ४ वटा मुद्दा दर्ता भएका छन् भने ५ पीडितहरूले जाहेरी दिएका थिए। यसै आधारमा ‘अप्रेसन लाइफ फिल्ड’ नाम दिएर अनुसन्धान अगाडि बढाइएको थियो।
प्रारम्भिक अनुसन्धानका क्रममा, गिरोहले मिर्गौला दिने इच्छुक व्यक्तिलाई गाडीको व्यवस्था गरी दिल्लीसम्म पुर्याउने र होटलमा बस्ने खाने व्यवस्थासहित चिकित्सक बोलाएर रगत जाँच गर्ने गरेको पाइएको छ। पीडितलाई बेहोस पारेर अस्पतालमा ३–४ दिन राखेर मिर्गौला निकाल्ने र नेपाल फर्काउने कामसमेत गरिएको थियो।
पक्राउ परेकाहरूले सोधपुछमा भण्डारीले ६ लाख भारतीय रुपैयाँ दिने प्रलोभनमा पार्ने गरेको स्वीकारेका छन्। प्रहरीले प्रारम्भिक बयानका आधारमा भण्डारीले २५ जनाको मिर्गौला निकालेर पैसा लिएको र एक सयभन्दा बढी व्यक्तिहरूको मिर्गौला बेचबिखनमा संलग्न रहेको जानकारी दिएको छ।
गत साउन २० गते गिरोहका अन्य तीन सदस्यलाई पनि पक्राउ गरिएको थियो। प्रहरीले यस मामिलामा थप अनुसन्धान जारी राखेको छ।
