रामेछाप । अम्बर आदर्श बचत तथा ऋण सहकारी संस्थाले आर्थिक वर्ष २०८०÷०८१मा १५ लाख २१ हजार ८ सय ४५ रुपैयाँ नाफा कमाउन सफल भएको छ । शनिवार मन्थलीमा भएको २३ औ वार्षिक साधारण सभाको अवसरमा १५ लाख २१ हजार ८ सय ४५ रुपैयाँ नाफा कमाउन सफल भएको प्रतिवेदन कोषाध्यक्ष रमेश ढुङ्गेलले प्रस्तुत गरेको प्रतिवेदनमा उल्लेख गरिएको छ ।
अम्बर आदर्श साकोसले १ हजार १ सय शेयर सदस्यको शेयर पुँजी रु ३१ लाख ३८ हजार २ सय ८४ रुपैयाँ, निक्षेप सङ्कलन मार्फत सङ्कलित रकम रू १ करोड ९२ लाख ५० हजार ८ सय ४६ रुपैयाँ सहित १ करोड ६९ लाख ८८ हजार ४ सय ८३ रुपैयाँ लगानी गरी उक्त रकम नाफा कमाएको र गत वर्ष ६ लाख ३४ हजार नाफा कमाएको यस संस्थाले यस वर्ष दोब्बर भन्दा बढी नाफा कमाएको पनि दाबी गरेको छ ।
संस्थाका अध्यक्ष भोला बहादुर थापाको अध्यक्षतामा सम्पन्न उक्त कार्यक्रमको उद्घाटन गर्दै कार्यक्रमका प्रमुख अतिथि समेत रहेका जिल्ला सहकारी सङ्घ रामेछापका अध्यक्ष हिमाल ढुङ्गेलले सहकारी सञ्चालकहरूलाई सहकारीको नीति र विधान भन्दा बाहिर नजान आग्रह गर्नु भएको छ ।
सो अवसरमा कार्यसमितिका उपाध्यक्ष भुवन थापा,नेपाल पत्रकार महासङ्घ रामोछापका निवर्तमान अध्यक्ष बद्री नयाँघरे,वर्तमान अध्यक्ष दीपक घिमिरे,नेफ्स्कुन रामेछापका फिल्ड अधिकृत सूर्य बहादुर थापा,जिल्ला बचत सङ्घका महासचिव शिवराज श्रेष्ठ लगायतले आ–आफ्नो मन्तव्य राख्नु भएको थियो ।
संस्थाको बन्द सत्रले कोषाध्यक्ष ढुङ्गेल द्वारा प्रस्तुत २ करोड ९६ लाख ६१ हजार ९ सय १९ रुपैयाँ कारोबार सहितको आम्दानी तथा खर्चको विवरण पास गर्नुका साथै सचिव कुमार खत्री द्वारा प्रस्तुत साङ्गठनिक प्रतिवेदन समेत पास गरेको छ ।
