काठमाडौं –स्वास्थ्य तथा जनसंख्या मन्त्रालयले मातहतका सबै संघीय अस्पताल र स्वास्थ्य संस्थाहरूलाई एक हप्ताभित्र वार्षिक व्यावसायिक योजना पेश गर्न निर्देशन दिएको छ। संस्थागत कार्यक्षमता अभिवृद्धि, योजनाबद्ध रूपमा काम अघि बढाउने र समयमै बजेट कार्यान्वयन सुनिश्चित गर्ने उद्देश्यसहित मन्त्रालयले बुधबार परिपत्र जारी गरेको हो।
मन्त्रालयका प्रवक्ता डा. प्रकाश बुढाथोकीका अनुसार प्राप्त हुने योजनाको आधारमा मन्त्रालय र मातहतका संस्थाबीच कार्य सम्पादन सम्झौता गरिनेछ। “हाम्रो लक्ष्य स्वास्थ्य सेवाको गुणस्तर सुधार गर्नु र प्रत्येक संस्थालाई आफ्नो लक्ष्यप्रति जिम्मेवार बनाउनु हो,” उनले भने, “सम्झौताले वार्षिक कार्ययोजनाको प्रगति मापन गर्न सजिलो बनाउँछ।”
विगतमा बजेट भाषणमा समावेश भएका धेरै स्वास्थ्य कार्यक्रम कार्यान्वयनमा ढिलाइ हुने, बजेट समयमै खर्च हुन नसक्ने जस्ता गुनासो दोहोरिँदै आएका थिए। महालेखा परीक्षकको प्रतिवेदनले पनि यी कमजोरी बारम्बार औंल्याउँदै आएको छ। यही समस्यालाई सम्बोधन गर्न मन्त्रालयले आर्थिक वर्षको सुरुवातमै सक्रियता देखाएको हो।
स्वास्थ्य संस्थाहरूको स्थापना, सञ्चालन तथा स्तरोन्नति निर्देशिका, २०७० ले प्रस्तावित संस्थाका लागि व्यावसायिक योजना आवश्यक हुने व्यवस्था पहिल्यै गरेको भए पनि, सञ्चालनमा रहेका सबै संघीय संस्थालाई एकैपटक यस्तो योजना पेश गर्न परिपत्र गरिएको यो पहिलोपटक हो। मन्त्रालयका उच्च अधिकारीका अनुसार, अब स्वास्थ्य क्षेत्रमा कार्य सम्पादन सम्झौता प्रभावकारी रूपमा लागू गरी स्रोत र साधनको अधिकतम उपयोग गर्दै विशेष सेवा विस्तार र समग्र स्वास्थ्य सेवा प्रवाह सुदृढ पारिनेछ।
