भक्तपुर, जेठ २५ – आदिवासी जनजाति पत्रकार महासङ्घ (फोनिज) बागमती प्रदेशले आयोजना गरेको “पत्रकारितामा कृत्रिम बुद्धिमत्ता (एआई) को प्रयोग” विषयक दुई दिने तालिम शनिबार भक्तपुरमा सम्पन्न भएको छ। बागमती प्रदेश सरकारअन्तर्गत आन्तरिक मामिला तथा कानुन मन्त्रालयको सहयोगमा तालिम २०८२ साल जेठ २३ र २४ गते सम्पन्न भएको हो।
तालिमको उद्घाटन समारोहमा मध्यपुर ठिमी नगरपालिकाका प्रमुख सुरेन्द्र श्रेष्ठ प्रमुख अतिथिका रूपमा सहभागी हुनु भयो। फोनिजका संघीय महासचिव तथा तालिमका प्रशिक्षक समिर बालामी विशेष अतिथि रहनु भयो भने कार्यक्रमको अध्यक्षता फोनिज बागमती प्रदेश अध्यक्ष युवराज श्रेष्ठले गर्नुभयो। कार्यक्रममा तामाङ पत्रकार संघका साइला लामा र नेवा पत्रकार राष्ट्रिय दबुका नृपेन्द्रलाल श्रेष्ठले शुभकामना मन्तव्य राख्नुभएको थियो।
बागमती प्रदेशअन्तर्गतका काठमाडौं, ललितपुर, भक्तपुर, सिन्धुपाल्चोक, काभ्रेपलाञ्चोक, चितवन, मकवानपुर, नुवाकोट, रसुवा, धादिङ, रामेछाप र दोलखा जिल्लाबाट सहभागी भएका पत्रकारहरूको उल्लेखनीय उपस्थिति रहेको तालिममा फोनिज सदस्यहरू सहित नयाँ प्रविधिमा चासो राख्ने सञ्चारकर्मीहरूको समेत सक्रिय सहभागिता रहेको थियो।
प्रशिक्षक समिर बालामीले पत्रकारिता क्षेत्रमा एआईको प्रयोगबारे विस्तृत जानकारी दिँदै समाचार लेखन, अनुसन्धान, डाटा विश्लेषण, फ्याक्ट-चेकिङ तथा बहुभाषिक अनुवादजस्ता क्षेत्रमा एआईको प्रभावकारी प्रयोगबारे प्रशिक्षण दिनुभयो। सहभागीहरूलाई व्यावहारिक अभ्यास गराउँदै उनले एआईको प्रयोगबाट पत्रकारितामा आउने अवसर र चुनौतीबारे समेत चर्चा गर्नुभयो।
समापन सत्रमा बागमती प्रदेशसभा सदस्य सुरेश श्रेष्ठ प्रमुख अतिथिका रूपमा सहभागी हुनु भयो। उहाँले तालिम सफलतापूर्वक सम्पन्न भएकोमा खुसी व्यक्त गर्दै सहभागी पत्रकारहरूलाई प्रमाणपत्र वितरण गर्नुभयो। साथै, प्रविधि र विविधताबीच सन्तुलन खोज्दै यस्ता कार्यक्रमहरूलाई राज्यको प्राथमिकतामा राख्नुपर्ने धारणा व्यक्त गर्नुभयो।
फोनिज बागमती प्रदेश अध्यक्ष युवराज श्रेष्ठले तालिमले डिजिटल युगमा पत्रकारिताको नयाँ ढोका खोलेको बताउँदै आगामी दिनमा अझ व्यापक रूपले यस्ता कार्यक्रमहरू सञ्चालन गरिने योजना रहेको जानकारी दिनुभयो।
उक्त तालिमले आदिवासी जनजातिका पत्रकारहरूबीच प्रविधिको पहुँच विस्तार, प्रतिस्पर्धात्मक सशक्तीकरण र जिम्मेवार पत्रकारिता प्रवर्द्धनमा एआईको सकारात्मक प्रयोग गर्ने दिशामा सघाउने अपेक्षा गरिएको छ।
