रामेछाप । खानेपानी डिभिजन कार्यालय रामेछापले सदियौ देखी खानेपानीको समस्या झेल्दै आएका जिल्लाको पश्चिमी क्षेत्र अन्तर्गत विकट मानिने गौश्वाराको ट्याक्सीनमा बसोवास गर्ने ५० घरधुरी उपभोक्ताहरुलाई घरघरमा नै खानेपानी सुविधा पुर्याएको छ ।
दोरम्वा गाउँपालीका वडा नं ४ गौश्वारा अन्तर्गत रुकमनी सानो शैलुङ्ग, पाखाखोला र टुनिखोला गरी तीनवटा मुहानबाट पानी संकलन गरी रातामाटा डाँडामा १४ हजार घनमिटरको ट्याकी निमार्णगरी उक्त पानी संकलन पछि घरघरमा निमार्ण भएको १२ वटा धारापोष्ट मार्फत पानी वितरण गरिएको हो ।
खानेपानी डिभिजन कार्यालय रामेछापको ८० लाख १८ हजार ४ सय रुपैयाँ र स्थानिय जनश्रमदान १७ लाख ८१ हजार गरी कुल ९७ लाख ९९ हजार ४ सय रुपैयाँको लागतमा उक्त योजना सम्पन्न भएको खानेपानी तथा सरसफाई डिभिजन कार्यालय रामेछापका इन्जिनिएर नवराज सत्यालले जानकारी दिए । उनले भने– लेकाली भुभाग भएता पनि उक्त क्षेत्रमा खानेपानीको चरम समस्या रहेको र उपभोक्ताहरु एक गाग्राी पानीको लागि घण्टौं लगाएर हिड्नु पर्ने अर्कोतर्फ खुल्ला खोलाको पानी उपभोग गर्दा झाँडापखाला लगाएतका विभिन्न किसिमका रोगहरु लाग्दा समेत खोलाकै पानी प्रयोग गर्दै आएकोमा अब उक्त समस्याको कार्यालयले अन्त्य गरेको बताए ।
गाउँमा खानेपानी नहुँदा एक गाग्राी पानी लिन लेकको एक घण्टाको चिप्लो बाटो हिडेर पाखाखोलावाट पानी ल्याएर खानुपर्दा सारै समस्या  थियो । अब त्यो समस्या सदाको लागी अन्त्य भएको रातामाटा खानेपानी उपभोक्ता समितिका अध्यक्ष रुकमनी तामाङ्गले जानकारी दिए । उनले भने– निमार्ण सम्पन्न भएको खानेपानी योजना दिगो वनाइ राख्न उपभोक्ताहरुले मर्मत कोष समेत खडा गरी रकम जम्मा गर्ने र पाइप लाइन विग्रे भत्केको खण्डमा त्यहीँ रकम खर्चेर मर्मत गर्ने गरी उपभोक्ताहरुले व्यवस्थापन समेत मिलाएको बताए ।