रामेछाप । मन्थली नगरपालिका–९ पुरानागाउँको वडा कार्यालयमा रहेको मतदान केन्द्रमा दुई क्रियापुत्रिले मतदान गरेका छन् ।
बाबु नरराज पुरीको निधन पछि कोरामा रहेका दुई छोरा नीलकण्ठ पुरी र प्रकाश पुरीले मतदान स्थलमा पुगेर मतदान गरेका हुन् । उनीहरुसँगै उनका श्रीमतीले पनि प्रतिनिधिसभा सदस्य र प्रदेशस सभा सदस्यमा उम्मेदवार वनेका नेताहरुलाई मतदान गरेका हुन् । आफ्नो सिङ्गो परिवार नै शोकमा डुबेको समयमा पनि आफ्ना उम्मेदवारहरु निर्वाचित हुन र देश विकासमा टेवा पुर्याउन भन्ने उद्धेश्यले आफुले मतदान केन्द्रमा आएर मतदान गरेको प्रकाश पुरीले जानकारी दिए ।
मतदान स्थलमा खटिएका कर्मचारीहरुले क्रियापुत्रीलाई सहज ढंङ्गले मतदान गर्ने वातावरण मिलाइदिएका थिए । रामेछापमा ९६ मतदान स्थल र २२६ वटा मतदान केन्द्रवाट मतदान भइरहेको छ । सबै मतदान केन्द्रहरुमा मतदाताको संख्या पातलो रहेको निर्वाचनमा खटिएका मतदान अधिकृतहरुले बताएका छन् ।
जिल्लाभर दिउँसो २ बजेसम्म कुल ४० प्रतिशत मत खसेको रामेछापका प्रमुख जिल्ला अधिकारी शोभाखर रेग्मीले जानकारी दिए । उनले भने– केही मतदान स्थलमा होहल्ला गरेर मतदातालाई प्रभावित पार्न खोजिएपनि तत्कालै सुरक्षाकर्मीले उछृखल गतिविधिमा संलग्न व्यक्तिहरुलाई सम्झाईबुझाई गरेपछि अवस्था शान्त रहेको र जिल्लाभर त्यस्तो कुनै अप्रिय घटनाहरु नभएको पनि प्रजिअ रेग्मीले बताए ।
रामेछापमा कुल १ लाख ८० हजार १ सय ६ जना मतदाताहरु रहेका छन् ।
