काठमाडौं, २५ साउन । भुटानमा जारी एएफसी यू–२० महिला एसियन कप छनोटमा नेपाल आज विश्व च्याम्पियन उत्तर कोरियासँग भिड्दैछ। समूह ‘ए’ मा उत्तर कोरियाले साउदी अरेबियालाई १५–० र भुटानलाई १०–० ले हराइसकेको छ भने नेपालले भुटानसँग १–१ को बराबरी र साउदीलाई १–० ले पराजित गरेको छ।
६ अंकसहित शीर्ष स्थानमा रहेको उत्तर कोरियालाई रोक्न सक्नु नेपालका लागि ठूलो चुनौती हो। समूह विजेता बने मात्र एसियन कपमा सिधै स्थान पाउने भएकाले नेपाललाई जित्नै पर्ने अवस्था छ, बराबरी वा हारले बाहिरिनुपर्नेछ।
यो खेलले दुई दशकअघिको सम्झना पनि जगाएको छ। सन् २००४ को एएफसी यू–१९ महिला एसियन च्याम्पियनसिपमा नेपाल पहिलो खेलमै उत्तर कोरियासँग १९–० ले पराजित भएको थियो। त्यतिबेला थाइल्याण्डसँग ६–१ र उज्बेकिस्तानसँग ४–१ ले हार्दै नेपाल समूह चरणमै बाहिरिएको थियो।
त्यो टिमकी सदस्य तथा पूर्वकप्तान अनु लामाका अनुसार त्यो समय नेपालमा महिला फुटबल खासै विकसित थिएन र टिमले एक महिनामात्र प्रशिक्षण पाएको थियो। त्यतिबेला अनुका साथै भगवती थापा, इन्दु दुवाल, मधु थापा, प्रमिला राई लगायत खेलाडी सहभागी थिए।
अहिलेको परिस्थितिमा पनि उत्तर कोरिया उमेरसमूह स्तरमै एसिया र विश्वकै बलियो टिम मानिन्छ। यसपटक पनि उनीहरूले अहिलेसम्म २५ गोल गरेका छन्, एक गोल पनि नखाई। नेपालका लागि यस खेलमा बराबरी नै उपलब्धि मानिने देखिन्छ।
