दोलखा — वैत्येश्वर गाउँपालिका–३, खानीगाउँस्थित आँकुरा इङ्लिस बोर्डिङ स्कुलका प्रिन्सिपल अजितकुमार चौधरीले कक्षा ५ मा अध्ययनरत १२ वर्षीय रञ्जित राउतमाथि निर्घात कुटपिट गरेका छन्।
सोमबार कार्यकक्षमै लगेर प्रिन्सिपलले कुटेपछि बालकको दुवै तिघ्रा निलडाम भएको र घाँटीमा चोट लागेको अभिभावकले बताएका छन्। मंगलबार चरिकोटस्थित अस्पतालमा गरिएको परीक्षणमा प्रभावित स्थानमा रगत जमेको र मासु च्यातिएको देखिएको छ।
पीडितका पिता जितबहादुर राउतका अनुसार छोरा रातभर छटपटिँदा मात्र घटना थाहा भएको हो। “अस्पतालमा जाँच्दा कुर्कुच्चा टेक्नै नसक्ने अवस्था देखियो,” उनले भने।
घटनाबारे प्रिन्सिपल चौधरीले ढुंगामुढा खेल्ने क्रममा आफ्नी छोरी घाइते भएपछि अन्य विद्यार्थीले दोषारोप गरेको तर रञ्जितले नस्वीकार्दा आक्रोशित भई कुटेको स्वीकार गरेका छन्। उनले भने, “नियतले होइन, भवितव्यले भयो। अबदेखि कहिल्यै नपिट्ने बाचा गर्छु।”
घटनापछि पीडित परिवारले जिल्ला प्रहरी कार्यालयमा उजुरी दिएको छ। प्रहरी प्रमुख डिएसपी ज्ञानकुमार महतोका अनुसार दुवै पक्षलाई छलफलका लागि बोलाइएको र पीडितको मागअनुसार कानुनी प्रक्रिया अघि बढाइनेछ।
