रामेछाप, भदौ ६ । अखिल नेपाल महिला संघ (अनेमसंघ) जिल्ला कमिटी दोलखाले हरितालिका तीज–२०८२ को अवसरमा शुक्रबार तीज विशेष कार्यक्रम आयोजना गरेको छ । कार्यक्रममा बागमती प्रदेशका नवनियुक्त वन तथा वातावरण मन्त्री भरतबहादुर केसीलाई बधाई तथा शुभकामना पनि दिइयो ।
महिलाहरूको उत्साहपूर्ण सहभागितामा सम्पन्न कार्यक्रममा नेकपा (एमाले) पोलिटब्युरो सदस्य पार्वत गुरुङ प्रमुख अतिथि रहेका थिए । कार्यक्रममा अनेमसंघका केन्द्रीय सदस्य उर्मिला थामी, शान्ति कुमारी तामाङ, एमाले सल्लाहकार परिषद् सदस्य डवल पाण्डे, प्रदेश कमिटी सदस्य लक्ष्मण गुभाजु, डा. जानुका न्यौपाने, एमाले दोलखा अध्यक्ष नरबहादुर श्रेष्ठसहितका नेताहरू सहभागी थिए ।
यस्तै, मेलुङ गाउँपालिका अध्यक्ष हिराकुमार थोकर, उपाध्यक्ष गायत्री आचार्य, विभिन्न जनप्रतिनिधि, मदन भण्डारी फाउन्डेसनका संयोजक कृष्ण बस्नेत, जिल्ला कमिटी पदाधिकारी, जनसंगठनका प्रतिनिधि लगायतको उपस्थिति थियो ।
कार्यक्रममा सहभागीहरूले तीजको दर खाएका साथै नाचगान गर्दै पर्वलाई उल्लासपूर्ण ढंगले मनाए । आयोजक अनेमसंघले तीजलाई मनोरञ्जन मात्र नभई सामाजिक सद्भाव, आपसी समझदारी, भाइचारा र एकतालाई प्रोत्साहित गर्ने पर्वका रूपमा मनाउनुपर्नेमा जोड दिएको छ ।
