रामेछाप । ब्यवसायीसँग बुझ्दै आएका साबिकका कर कार्यालयले बुझेको रेकर्ड जिम्मेवारी सरेका कर कार्यालयलाई नबुझाइ पुनः  दोहोरो कर तिर्न ब्यवसायीलाइ कार्यालयले ताकेता गरेपछि रामेछापका व्यवसायी मारमा परेका छन् ।

साविकका कर कार्यालयले जिम्वेवारी सरेका कार्यालयलाई व्यवसायीले तिरेको करको रेकर्ड नबुझाउँदा वर्षेनी राज्यलाई कर तिर्दै आएका व्यवसायीको कर तिर्न बाँकी रहेको भन्दै कार्यालयले बक्यौता रकम देखाएपछि रामेछापका अधिकासं व्यवसायीहरु आक्रोसित बनेका छन् । रामेछापका व्यवसायीहरुले २०५८ सालदेखी जनकपुरमा रहेको कर कार्यालयमा कर बुझाउँदै आएका थिए ।

राज्यलाई बुझाउनु पर्ने कर बर्षेनी कार्यालयमा पुगेर बुझाएका ब्यवसायीहरुको रेकर्ड जनकपुर कर कार्यालयले जिम्वेवारी लिएका कर कार्यालयलाई नबुझाई बक्यौता लगत मात्र बुझाएकाले व्यवसायीले बुझाएको करको रेकर्ड कार्यालयमा नहुँदा व्यवसायीहरु मारमा परेका हुन । जनकपुरमा रहेको कर कार्यालय भक्तपुर, काभ्रेको धुलिखेल हुँदै हाल रामेछापको सदरमुकाम मन्थलीमा करदाता सेवा कार्यालय संञ्चालनमा आएको छ । जिल्लामा करदाता सेवा कार्यालय आएपछि मात्रै व्यवसायीले आफ्नो लगतको बिषयमा जानकारी पाएको व्यवसायी जेएन दाहालले जानकारी दिए ।

उनले भने– हामीले वर्षेनी राज्यलाई बुझाउनु पर्ने कर बुझाएका छौं । कर कार्यालयको कमजोरीका कारण अहिले व्यवसायीले वर्षौदेखी कर नै बुझाएका छैनन् भन्दै तिरेको कर समेत जोडेर व्यवसायी माथी अन्याय गरेको छ । कार्यालयले तत्काल आफ्ना तालुके कार्यालयसँग समन्वय गरी बिगत वर्षमा व्यवसायीले तिरेको करको रेकर्ड भिडाएर हिसाव मिलान गर्नुपर्ने बताए ।

करदाता सेवा कार्यालय रामेछापले २०५१÷०५२ सालदेखी राज्यलाई बुझाउनु पर्ने कर नबुझाएको भन्दै तिर्न बाँकी रहेको बक्र्यौता रकमको विवरण कार्यालयले देखाएको छ । कर कार्यालयले तिर्न बाँकी रहेको रकम तत्काल बुझाउन व्यवसायीलाई उर्दी जारी गरेको छ । यसअघिका कार्यालयहरु जनकपुर, भक्तपुर र धुलिखेल कर कार्यालयमा हरेक वर्ष कर दाखिला गरी कर चुक्ता लिएका व्यवसायीको लगत समेत सो तिर्न बाँकी बक्याैता रकमको लगतमा समावेश गरेको छ ।

वर्षौदेखी व्यवसायीले राज्यलाई बुझाउनु पर्ने कर कार्यालयमा गएर बुझाएको भएता पनि कार्यालयको सफ्टवयरले पहिला बुझाएको करको विवरण प्रविष्ट नगर्दा समस्या भएको हुन सक्ने करदाता सेवा कार्यालय रामेछापका प्रमुख कृष्णप्रसाद न्यौपानेले जानकारी दिए । उनले भने– व्यवसायीको गुनासाको बिषयमा तत्काल सम्वन्धित तालुके कार्यालयमा जानकारी गराइसकेकाले यस बिषयमा छानविन हुने बताए ।

यसरी कार्यालयले व्यवसायीलाई दोहोरो कर तिर्न लगाउने गरी कर कार्यालयमा राखिएको तथ्याङ्कलाई तत्काल सुधार गर्दै समस्याको समाधानको पहल गर्न भन्दै रामेछाप उद्योग वाणिज्य संघले करदाता सेवा कार्यालयलाई पत्राचार समेत गरेको रामेछाप उद्योग बाणिज्य संघका कार्यकारी अधिकृत नबिन केसीले जानकारी दिए ।