धादिङको थाक्रे गाउँपालिकास्थित एक ढुङ्गा खानीमा माथिबाट खसेको ठूलो ढुङ्गाले टिपर च्याप्दा चालकको घटनास्थलमै मृत्यु भएको छ। थाक्रे–७ राम्चेमा सञ्चालित बज्रकाली रोडा ढुङ्गा उद्योगको खानीमा शुक्रबार यो दुर्घटना भएको हो।
बा५ख ८५८० नम्बरको टिपरमा ढुङ्गा लोड गर्ने क्रममा माथिल्लो भागबाट अचानक खसेको विशाल ढुङ्गाले गाडीलाई किचेको थियो। दुर्घटनामा परी टिपर चालक ३५ वर्षीय देवेन्द्र खत्रीको ज्यान गएको जिल्ला प्रहरी कार्यालय धादिङले जनाएको छ।
घटनालगत्तै पुगेको प्रहरी टोलीले मृतकको शव परीक्षणका लागि पठाएको छ। प्रहरीका अनुसार दुर्घटनाको कारणबारे थप अनुसन्धान अघि बढाइनुका साथै खानी सञ्चालनका क्रममा अपनाउनुपर्ने सुरक्षा मापदण्ड र व्यवस्थापकीय पक्षबारे समेत आवश्यक अध्ययन सुरु गरिएको छ।
