धादिङ । निलकण्ठ नगरपालिका–१०, ज्यामरुङका वडा सदस्य हिमप्रसाद पाठकविरुद्ध जातीय विभेद तथा छुवाछुत सम्बन्धी उजुरी परेको छ। स्थानीय रामबहादुर विसुन्खेले खेतमा पानी लगाएको निहुँमा आफूलाई जातीय आधारमा गालीगलौज गरेको भन्दै पाठकविरुद्ध जिल्ला प्रहरी कार्यालयमा उजुरी दिएका हुन्।
उजुरीसँगै प्रहरी अनुसन्धान सुरु भएको जिल्ला प्रहरी कार्यालय धादिङका नायब उपरीक्षक (डिएसपी) सुवास हमालले पुष्टि गरे। उनले भने, “हामीले हिजो मात्रै उजुरी लिएका छौं। अनुसन्धान थालिसकेका छौं। घटनाका प्रत्यक्षदर्शीहरूको बयान लिने काम भइरहेको छ।”
विसुन्खेले गत साउन १९ गते रोपाइँका लागि पाइपमार्फत पानी लगाउने क्रममा वडा सदस्य पाठकले गालीगलौज गर्दै आफूलाई जातीय रूपमा अपमान गरेको दाबी गरेका छन्। उनका अनुसार, “मैले मागेर पानी लगाएको थिएँ। तर उहाँले आएर रोक्नुभयो। मैले कारण सोध्दा उल्टै ‘तँ चमारे, मसँग मुखमुखै लाग्छस्’ भन्दै गाली गर्नुभयो। त्यसपछि अश्लील शब्द प्रयोग गर्दै खुकुरी ताकेर मार्ने धम्की दिनुभयो।”
विसुन्खेले सुरुवाती दिनमै उजुरी नदिएको तर पछि आफूलाई नै उल्टै दोष लगाइएको र कुटपिट समेत गरिएको आरोप लगाउँदै मुद्दा दर्ता गराएको बताए। उनका अनुसार, “गाउँकै मान्छे भएकाले उजुरी गर्नु पर्दैन भन्ने सोचेँ। तर पछि उहाँले मेरो श्रीमतीलाई दुर्व्यवहार गरेको भन्दै उल्टै आरोप लगाउनुभयो। त्यसपछि म बाध्य भएर उजुरी गर्न गएँ।”
तर, वडा सदस्य पाठकले भने आफ्नाविरुद्ध लागेको आरोप अस्वीकार गर्दै आफू पीडित भएको दाबी गरेका छन्। उनले भने, “मेरो मुहानको पानी उनले लगाएका रहेछन्। पानी छोडिदेऊ भन्दा मानेनन्। त्यसपछि सम्झाउन गएका मात्र हुँ। तर उल्टै मलाई पिटपिटेजस्तो गरे। मेरी श्रीमतीमाथि पनि दुर्व्यवहार भएको छ।” उक्त घटनाबारे प्रहरीले थप अनुसन्धान अघि बढाएको र प्रत्यक्षदर्शीका बयानपछि मात्र कानुनी प्रक्रिया अघि बढ्ने जनाएको छ।
