धादिङ । जिल्ला कारागार धादिङमा कैदीबन्दीले भाग्ने प्रयास गर्दा नेपाली सेनाले चलाएको गोली लागी एक कैदीको मृत्यु भएको छ । मृतक करिब ७५ वर्षका रहेका बताइएको छ । घटनामा सात जना कैदीबन्दी र सात जना प्रहरी घाइते भएका छन् ।
प्रमुख जिल्ला अधिकारी विजयराज सुवेदीका अनुसार कैदीबन्दीहरूले सुरक्षा घेरा तोड्दै बाहिर निस्कन खोजेपछि सेनाले गोली चलाउन बाध्य भएको हो । सुरुवाती प्रयासमा सेनाले पानीको फोहोरा प्रयोग गरी स्थिति नियन्त्रणमा ल्याउने कोशिस गरेको थियो तर कैदीबन्दीहरूले सुरक्षाकर्मीमाथि नै आक्रमण गर्न थालेपछि गोली प्रहार गरिएको उनले जानकारी दिए ।
गोली लागेर घाइते भएका कैदीबन्दीलाई सेनाको सुरक्षामा उपचारका लागि काठमाडौं पठाइएको छ । जनपथ र सशस्त्र प्रहरीका सात जना पनि घटनामा घाइते भए तर उनीहरूको अवस्था सामान्य रहेको अधिकारीहरूले बताएका छन् ।
मंगलबार नख्खु कारागारबाट पूर्वगृहमन्त्री रवि लामिछानेसहित कैदीहरू छुट्टिएको घटनापछि धादिङ कारागारका कैदीहरूले पनि आफूहरूलाई रिहा गर्न माग गर्दै बुधबार बिहानैदेखि आन्दोलित भएका थिए । उनीहरूले कारागारमै आगजनी गर्दै तोडफोड गरेपछि स्थिति नियन्त्रणमा लिन सेनाको सहयोग लिइएको हो ।
धादिङ कारागारमा हाल २४३ कैदीबन्दी रहेका छन्, जसमा ९ जना महिला छन् । कैदीबन्दीको प्रदर्शन र सुरक्षा निकायबीचको झडपसँगै मुलुकभरको कारागार व्यवस्थामा थप असुरक्षा बढ्दै गएको देखिन्छ ।
