रामेछाप । मन्थली नगरपालिका–१३ मा निमार्ण सम्पन्न नयाँ खिम्ती २२०÷१३२ केभी सवस्टेसनको प्रधानमन्त्री शेरवहादुर देउवाले शनिवार उद्घाटन गरेका
छन् ।
माथिल्लो तामाकोशी हाइड्रोपावर लिमिटेडद्धारा कार्यान्वयन गरिएको राष्ट्रिय गौरवको माथिल्लो तामाकोशी जलविद्युत परियोजना अन्तर्गत रामेछापको मन्थली नगरपालिकाको फुलासी साँखेमा निमार्ण सम्पन्न भएको हो । हाल निमार्ण भइरहेका तामाकोशी, लिखु र गज्र्याङ लगाएतका स्थानमा उत्पादित विद्युत यस सव स्टेसनमा जडान गरी राष्ट्रिय प्रसारण लाइनमा पठाइने यो सवस्टेसन निकै ठूलो र महत्वपूर्ण रहेको छ । सवस्टेसन निमार्णमा करिव १ अर्ब खर्च भएको छ ।
यस सवस्टेसनमा माथिल्लो तामाकोशी जलविद्युत आयोजनावाट उत्पादित ४५६मेघावाट र अन्य निजी क्षेत्रवाट उत्पादन भएका विद्युत गरी १ हजार मेघावाट विजुली यस सवस्टेसन मार्फत राष्ट्रिय प्रसारण लाइनमा जोडिने छ । हाल तामाकोशी करिडोरको विजुली तामाकोशी–खिम्ती–ढल्केवर प्रसारण लाइनवाट ढल्केवरमा रहेको ४ सय केभी सवस्टेसनमा जोडिएको छ । त्यस्तैगरी १३२ केभी क्षमताको खिम्ती बाह्रविसे प्रसारण लाइन बनेको छ । हाल यो प्रसारण लाइन मार्फत तामाकोशीको विजुली काठमाण्डौंसम्म जाने गरेको छ ।
जीआइएस प्रविधिवाट बनेको २२० केभी क्षमताको सवस्टेसन यो नेपालकै पहिलो भएको आयोजक संस्थाले जनाएको छ । हाल ५२.४ मेगावाट उत्पादन क्षमताको लिखु ४ र २९ मेगावाट उत्पादन क्षमताको लिखु ए जलविद्युत आयोजनाको बिजुली यो सवस्टेसनमा जोडिइसकेको छ ।
