काठमाडौँ । नेपाली कांग्रेसका महामन्त्री गगन थापाले महाकाली नदीपूर्वका लिम्पियाधुरा, लिपुलेक र कालापानी क्षेत्रमार्फत चीन–भारतबीच भएको द्विपक्षीय व्यापार सम्झौता नेपालका लागि अस्वीकार्य रहेको स्पष्ट पारेका छन्। बिहीबार प्रतिनिधिसभाको विशेष समयमा बोल्दै उनले आफ्नो पार्टी नेपाली कांग्रेसले उक्त सम्झौता स्वीकार नगर्ने भन्दै सबै राजनीतिक दललाई प्रतिवादका लागि एकढिक्का हुन आग्रह गरे।
‘हाम्रो भूमिको बारेमा सम्झौता भएको पढ्यौं, सुन्यौं। नेपाली कांग्रेस पार्टी हाम्रा दुई छिमेकीले गरेको यो व्यवहारप्रति गम्भीर असहमति प्रकट गर्दछ,’ उनले भने, ‘यो आपत्तिजनक छ, अस्वीकार्य छ। नेपाल सरकारले जुन पहलकदमी अघि बढाएको छ, सबैलाई समेटेर अघि बढाओस्।’
थापाले यस मुद्दामा दलगत भेदभावभन्दा माथि उठेर साझा राष्ट्रिय धारणा बनाउनुपर्नेमा जोड दिए। ‘यो विषयमा नेपालका राजनीतिक दलहरू एक ठाउँमा उभिनुपर्छ। म नेपाली कांग्रेस पार्टीका तर्फबाट एकढिक्का हुन आग्रह गर्दछु,’ उनले भने, ‘उग्र राष्ट्रवादी नबनौं, तर एउटै सन्देश दिनुपर्छ—हाम्रो भूमिमाथि आँखा लगाउने कुरा स्वीकार्य छैन। नेपालले यसको प्रतिवाद गर्छ र यही पोजिसन बनाउँछ।’
