निर्वाचन आयोगले भोलि चैत २२ गतेदेखि मतदाता नामावली सङ्कलन तथा अद्यावधिक कार्यक्रम पुनः सुरु गर्ने भएको छ। प्रतिनिधिसभा सदस्य निर्वाचनका कारण गत मङ्सिर ६ गतेदेखि स्थगित गरिएको यो प्रक्रिया आयोगको निर्णयअनुसार भोलिदेखि देशभर सुचारु हुन लागेको हो।
आयोगले जारी गरेको प्रेस विज्ञप्तिअनुसार, राष्ट्रिय परिचयपत्र नम्बर प्राप्त गरिसकेका नेपाली नागरिकले अनलाइन प्रणालीबाटै मतदाता नामावलीमा आफ्नो नाम दर्ता गर्न सक्नेछन्। राष्ट्रिय परिचयपत्र नभएका नागरिकको हकमा भने आयोगको अनलाइन फारम (Pre-Enrollment) भरी फोटो र औँठाछाप जस्ता जैविक विवरण (Biometrics) दिन सम्बन्धित प्रदेश वा जिल्ला निर्वाचन कार्यालयमा स्वयं उपस्थित हुनुपर्नेछ।
दर्ताका अतिरिक्त, मतदाता नामावलीमा रहेका नाम, थर वा ठेगानाका त्रुटि सच्याउन, एकै वडाभित्रका पायक पर्ने मतदान स्थलमा नाम सार्न, दोहोरो नाम हटाउन तथा मृत्यु वा बसाइँसराइको विवरण अद्यावधिक गर्न पनि अनलाइन माध्यमबाटै आवेदन दिन सकिने व्यवस्था मिलाइएको आयोगका प्रवक्ता नारायण प्रसाद भट्टराईले जानकारी दिनुभयो।
