रामेछाप । बर्तमान सरकारको बिकल्प नभएको नेकपा एमाले बागमती प्रदेश कमिटीका अध्यक्ष कैलाश प्रसाद ढुङ्गेलले बताउनु भएको छ । आइतबार नेकपा एमालेको पार्टी कार्यलय मन्थलीमा पत्रकारहरु सग कुरा गर्दै नेपालमा बर्तमान सरकारको विकल्प नभएको बताउनु भयो ।
बागमती प्रदेशका पूर्व आर्थिक मामिला तथा योजना मन्त्री समेत रहनु भएको अध्यक्ष ढुङ्गेलले मुलुकका ठुला राजनीतिक पार्टीहरू नेपाली काँग्रेस र नेकपा एमाले मिलेर बनेको वर्तमान सरकार भन्दा अर्को कुनै पनि विकल्प नरहेको बताउनुभयो । उहाँले भन्नुभयो “अहिले नेपालका मूलधारका दुई प्रमुख दलहरू एमाले र काँग्रेस मिलेर सरकार बनाएका छन् । यो सरकार पनि बदलिनु पर्ने अवस्था भयो भने नेपालको लोकतान्त्रिक अभ्यासको अर्को विकल्प छैन । यो कुरा प्राक्टिस भइसकेको छ । यही सरकारले मुलुकको दिगो विकास गर्छ । यसमा कुनै शङ्का छैन ।”
अहिलेको सरकार सरकारका लागि सरकार नबनेर काम गर्नका लागि बनेको उहाँको भनाई छ । मुलुक विकासका लागि वर्तमान सरकार नै अन्तिम विकल्प भएको थाहा पाएपछि अहिले अराजकतावादीहरू सरकारलाई छरपस्ट पार्न सक्रिय बनेको उहाँले बताउनुभयो । अहिले काँग्रेस एमालेको गठबन्धन भए पनि अराजकतावादीहरूले विभिन्न माध्यमबाट प्रधानमन्त्री केपी शर्मा ओलीमाथि प्रहार गरिरहेको अध्यक्ष ढुङ्गेलले बताउनुभयो । उहाँले भन्नुभयो “यो सरकारको विकल्प नदेखेपछि यो सरकारलाई छरपस्ट पार्न अराजकतावादीहरू लागेका छन् ।
यस्ता अराजकतावादीहरूले नेपाल श्रीलङ्का, बङ्गलादेश बन्छ भन्दै हल्ला गरिरहेका छन् । विशेष गरी काँग्रेस र एमालेको सरकार छ । प्रधानमन्त्री केपी शर्मा ओली हुनुहुन्छ । अराजकतावादीहरूले प्रधानमन्त्री केपी शर्मा ओली माथि प्रहार गरिरहेका छन् ।”
