रामेछाप । जिल्ला प्रहरी कार्यालय रामेछापले बरामद अफिम नष्ट गरेको छ । प्रहरीले फागुन २६ गते सुनापति गाउँपालिका वडा नं ३ हिलदेवीबाट दुई महिला सहित ७ हजार बोट लागू औषध (अफिम) बरामद गरिएको थियो । कानुनी प्रक्रिया पुरा गरी सोमबार प्रहरी परिसर भित्र नष्ट गरेको हो ।
सुनापती गाउँपालिका वडा नम्बर ३ हिलदेवीमा मेखबहादुर तामाङ र जगत तामाङको अन्दाजी ६ रोपनी घर जग्गा भाडामा लिएर रुकुम पुर्वीभेग पुथा उत्तर गङ्गा गाउँपालिका १ का ६८ वर्षीय बुद्धि माया पुन मगर (गुरुङ) र सोही ठाउँकी वडा नं ५ घर भई हिलेदेवी बस्दै आएकी ४२ वर्षीय कान्छीले अफिम खेती गर्दै आएको थियो । सोही आधारमा उनीहरूलाई लागू औषध विरुद्ध मुद्दा दर्ता भएर थप अनुसन्धान भइरहेको जिप्रका रामेछापका प्रवक्ता एवं प्रहरी निरीक्षक रञ्जन गिरीले जानकारी दिए ।
कानुन अनुसार जग्गा धनी समेत कानुनी दायरामा पर्ने व्यवस्था रहेको छ । दुई महिलाले हिलदेवीका जग्गा धनी र स्थानीयहरूलाई झुक्काएर अफिम खेती गर्दै आएको पाइएको अनुसन्धानबाट खुलेको प्रहरीको दाबी छ । उक्त (अफिम) जिल्ला प्रहरी कार्यालय रामेछाप परिसरमा प्रहरी प्रमुख (डिएसपी) होमबहादुर पराजुली, मन्थली नगरपालिका वडा नं १ का वडा अध्यक्ष होम प्रसाद पौडेल (रामहरि), वडा नं ४ सालुका वडा अध्यक्ष राजन घिमिरे, जिल्ला अदालत रामेछापका प्रतिनिधि, पत्रकार महासङ्घ रामेछापका अध्यक्ष बद्री नयाँघरे सहित पत्रकारहरूको उपस्थितिमा सोमबार खाल्डो खनेर गाडिएको हो ।
