मुम्बई । बलिउड अभिनेता गोविन्दाको वैवाहिक जीवन फेरि विवादमा तानिएको छ। उनकी पत्नी सुनिता आहुजाले बान्द्रा फेमिली कोर्टमा सम्बन्धविच्छेदको निवेदन दिएकी छिन्। भारतीय सञ्चारमाध्यमका अनुसार, डिभोर्स पेपरमा सुनिताले गोविन्दामाथि अन्य महिलासँग शारीरिक सम्बन्ध राखेको र आफूलाई क्रूरतापूर्ण व्यवहार गरेको गम्भीर आरोप लगाएकी छन्। उनले हिन्दू विवाह ऐन, १९५५ को धारा १३(१)(आई), (आईए) र (आईबी) अन्तर्गत कानुनी प्रक्रिया अघि बढाएकी बताइएको छ।
अदालतले गत मे २५ मा गोविन्दालाई पेशीमा उपस्थित हुन आदेश दिएको थियो। त्यसयता दुवै पक्षले मिलापत्रको प्रयास गरिरहेका भए पनि गोविन्दा अदालतमा उपस्थित नभएको र सुनिता भने नियमित उपस्थित हुँदै आएकी छन्। तर, अभिनेता नजिकका स्रोत र म्यानेजरले यी समाचारलाई ‘सिर्फ अफवाह’ भन्दै खारेज गरेका छन्।
यसअघि पनि करिब ६ महिना अगाडि दुवैबीच सम्बन्धविच्छेदको चर्चा चर्किएको थियो। त्यतिबेला गोविन्दाको एक मराठी अभिनेत्रींसँग अफेयर भएको हल्ला चलेको थियो। तर, त्यसबेला पनि नजिकका साथी र म्यानेजरले यो दाबीलाई असत्य बताएका थिए। लामो समयदेखि छुट्टाछुट्टै बस्दै आएको खबर सार्वजनिक भइरहे पनि सुनिताले अन्ततः आफैं गोविन्दासँग सम्बन्धविच्छेद नगर्ने भन्दै स्पष्ट पारिन्।
हाल भ्लगिङमा सक्रिय सुनिताले मन्दिर दर्शनका क्रममा जीवनका उतारचढावबारे भावुक हुँदै भनेकी थिइन्, “जब मैले गोविन्दालाई भेटेँ, मैले आमालाई भनेकी थिएँ कि म उनीसँग विवाह गर्नेछु र हाम्रो जीवन राम्रोसँग चलोस्। आज पनि विश्वास छ, माँ कालीले मेरो परिवारलाई जोगाउनुहुन्छ।”
तर, द इण्डियन एक्सप्रेसलगायतका प्रतिष्ठित मिडियाले भने सुनिताले बान्द्रा फेमिली कोर्टमा सम्बन्धविच्छेदको निवेदन दिएको पुष्टि गरेका छन्।
