रामेछाप । दोरम्वा गाउँपालिका वडा नं–५ गुन्सालमा निमार्णाधिन एकीकृत नमुना वस्ती बजेट अभाव हुँदा अलपत्र परेको छ ।
स्थानिय सेतीदेवी जनजागृती युवा समाजले दोरम्वा–५ गुन्सालका ३० घर परिवारको आबासको लागि निमार्ण शुरु गरिएको उक्त भवनको लागि कुल ३ करोड ३२ लाख रुपैयाँ खर्च लाग्ने जनाइएको छ । भवन निमार्णका लागि आवश्यक पर्ने वजेट संस्थासँग नहुँदा अहिले ती भवनहरु अलपत्र अवस्थामा रहेका छन् ।
एकिकृत वस्ती निमार्णको लागि राष्ट्रिय पुनःनिमार्ण प्राधिकरणले ९० लाख, एकीकृत वस्ती विकासको सेवा सुविधाको लागि १ करोड २० लाख र स्थानिय गाउँपालिकाको कार्यालय मार्फत वस्तीको सुरक्षाको लागि १० लाख रुपैयाँ रकम उपलव्ध गराउने सम्झौता भएको सेतीदेवी जनजागृती युवा समाजका अध्यक्ष प्रज्वल श्रेष्ठले जानकारी दिए ।
उनले भने– संस्थासँग भएको सम्झौता अनुसारको रकम पाउन सकेका छैनौ । सबै रकम पाउन सकेको भए हामीले समयमा नै काम सक्ने थियौ । अहिलेसम्म भवन निमार्णको काम ८५ प्रतिशत काम पुरा गरेका छौं । निमार्णाधिन एकीकृत वस्तीको भवन सँगै निमार्ण हुनुपर्ने शौचालय, आँगन र ढल व्यवस्थापनको काम अझै वाँकी रहेको छ । संस्थामा बजेट अभाव हुँदा ती काम पुरा हुन सकेको छैन् ।
बस्ती निमार्णको लागि राष्ट्रिय पुनः निमार्ण प्राधिकरणले दिनुपर्ने १२ लाख र एकीकृत वस्ती विकास सेवा सुविधा अन्तर्गतको ४० लाख रकम पाउन बाँकी रहेको छ । यी दुवै रकम पाउन सके निमार्णाधिन भवनको काम सम्पन्न हुने र भुकम्प लाभग्राहीलाई हस्तान्तरण गर्न सकिने अध्यक्ष श्रेष्ठ वताउँछन् ।
बजेट अभावमा अलपत्र रहेको एकीकृत वस्तीको बाँकी काम सम्पन्न गर्न स्थानिय गाउँपालिकाले बागमती प्रदेशसँग सहकार्य भइरहेकाले चाँडै नै केही रकमको व्यवस्थापन गर्ने गरी काम अघि वढेको दोरम्बा गाउँपालिकाका अध्यक्ष कमानसिंह मोक्तानले जानकारी दिए । उनले भने– रकम अभावले भवनको काम पुरा हुन सकेको छैन् । त्यो काम चाडै सक्ने गरी गाउँपालिकाले प्रदेश सरकारसँग रकम माग गरेका छौं । रोकिएको काम चाडै सकेर भुकम्प पिडीतलाई हस्तान्तरण गर्ने गरि पालिकाले काम अघि वढाएको छ ।
