रामेछाप । रामेछाप घर भई काठमाण्डौं बस्दै आएका दुई दाजु भाइले बिमाको रकम दाबी गर्न आफ्नै टिपरमा आगजनी गरेका छन् । उनीहरू सँगै सिन्धुलीका एक जनालाई समेत प्रहरीले प्रहरीले पक्राउ गरेको छ । जिल्ला प्रहरी परिसर ललितपुरले बिमा रकम लिन आफ्नै टिपरमा आगजनी गरेको आरोपमा तीन जनालाई पक्राउ गरेको हो ।
पक्राउ पर्नेमा रामेछाप घर भई काठमाडौँ महानगरपालिका–३२ कोटेश्वर बस्ने ३४ वर्षीय प्रदीपकुमार खत्री, सिन्धुली घर भई ललितपुर महालक्ष्मी नगरपालिका–५ टीका थली बस्ने रँगबहादुर बुढा क्षेत्री र रामेछाप घर भई टीका थली बस्ने ३३ वर्षीय भिमलेन खत्री छन् ।
१३ महिना अगाडि प्रदीपकुमार खत्रीले बा ३ ख २८९४ नम्बरको टिपर मासिक किस्ता तिर्ने गरी १३ दाख रुपैयाँमा खरिद गरेका थिए । उनका भाइ भिमलेन खत्रीले उक्त टिपर चलाउने गर्थे । तर चार महिना अगाडि गोदावरी नगरपालिका–(१२ ठेंचोस्थित नख्खु खोला कोरिडोर सडक खण्डमा बिग्रिएर थन्किएको थियो ।
मर्मत गर्न धेरै पैसा लाग्ने भएपछि उनीहरूले टिपरमा आगो लगाएर बिमा रकम प्राप्त गर्ने योजना बनाएका थिए । योजना अनुसार साउन १२ गते राति सवा १ बजे पेट्रोल छर्केर आगो लगाएका थिए । त्यही दिन दिउँसो प्रहरी वृत्त चापागाउँमा आगो लगाउने व्यक्तिहरूको खोजी गरी कारबाही गर्न माग गर्दै प्रदीपकुमार पुगेका थिए । उनले निवेदन दिँदा बिमा रकमका लागि आवश्यक सिफारिस गर्न भनेका थिए ।
प्रहरीलाई शका लागेपछि अनुसन्धान अघि बढाउँदा बिमा रकम प्राप्तिका लागि आफ्नै टिपरमा आगजनी गरेको खुलेको हो । उनीहरूमाथि आपराधिक उपद्रव कसुरमा ललितपुर जिल्ला अदालतबाट सात दिन हिरासतमा राखेर अनुसन्धान गर्न अनुमति लिएको छ ।
