रामेछाप — बीपी राजमार्ग विभिन्न स्थानमा क्षति पुगेपछि अहिले सम्म उक्त क्षेत्रमा यातयात अबरूद् छ । आइतबार साँझसम्म पनि सडक पूर्ण रूपमा खुलाउन समस्या हुने प्रहरीले जनाएको छ। अविरल वर्षा र बाढीका कारण बनेका डाइभर्सन बगाउँदा यातायात सञ्चालन प्रभावित बनेको हो।
जिल्ला प्रहरी कार्यालय काभ्रेका प्रमुख एसपी कोमल शाहका अनुसार राजमार्गका विभिन्न खण्डमा डाइभर्सन बग्दा काभ्रेको मङ्गलटार, भकुण्डे, काभ्रेभञ्ज्याङ र धुलिखेल तथा सिन्धुलीको नेपालथोक र खुर्कोट क्षेत्रमा सयौं सवारी साधन ‘होल्ड’ गरिएको थियो।
यात्रुहरूको असुविधालाई ध्यानमा राख्दै प्रहरीले मङ्गलटारमा रोकिएका यात्रुहरूलाई रोशीखोला पारिसम्म पैदल हिँडाएर त्यहाँबाट अर्को सवारीको व्यवस्था मिलाएको जनाएको छ। त्यसपछि यात्रुहरूलाई तेमालको कालधार–नारायणस्थान–भकुण्डे हुँदै धुलिखेलतर्फ पठाइएको छ।
प्रहरीका अनुसार सडक मर्मत तथा डाइभर्सन पुनः निर्माण कार्य जारी रहे पनि तत्काल पूर्ण रूपमा यातायात सञ्चालन सहज हुने अवस्था नरहेको बताइएको छ। यात्रुहरूलाई वैकल्पिक मार्ग प्रयोग गर्न तथा यात्रा गर्दा सतर्कता अपनाउन प्रहरीले अनुरोध गरेको छ।अहिले राजधानीसँग जोड्ने प्रमुख मार्गमा आवतजावत गर्ने यात्रुहरूलाई ठूलो सास्ती भएको छ ।
